Tempotimor (Dili)- Deputada Olinda Guterres husi bankada Kmanek Haburas Unidade Nasionál Timor Oan (Khunto) alega partidu CNRT mak hun ba empase polítika rai laran nune'e la aseita atu ukun hamutuk.
"Partidu CNRT nia pedidu hodi hamutuk ho Fretilin ne'e ami la aseita, tanba ne'e hanesan tama tan mai para atu sobu tan ami," dehan deputada Olinda Guterres iha salaun bankada Fretilin hafoin bankada PLP-Fretilin no Khunto halo komunikadu imprensa kona-ba destituisaun ba meza PN, Kuarta (06/05)
Nia dehan, CNRT mak sobu polítika iha rai laran hahú 2006 ate agora.
"Husi 2006 sobu, 2017 mós sobu, agora atu sobu tan ne'e labele ona," nia dehan
Kuadru ida husi partidu Khunto ne'e mós dehan, dalaruma pedidu husi partidu CNRT ne'e atu hamate partidu kiik sira.
VIDEO PUBLISIDADE APELU HUSI PM TAUR APLAUS BA FRONT LINE
"Signifika CNRT hakarak hamutuk ho Fretilin ne'e atu hamate partidu kiik sira? Dalaruma, dalaruma bele hamate, maibé Khunto mate la hetan ona, tanba Fretilin hakuak tiha ona ami, no ami mós gosta Fretilin mai hamutuk ho ami," dehan Olinda
Deputada ne'e mos dehan, só Fretilin deit mak hakuak partidu kiik.
"Partidu Fretilin hakarak hakuak partidu kiik sira, mais partidu CNRT hakarak buka mak partidu boot. Entaun ami ida hetan kadera ida ka rua oan ne'e, haneaan ami Khunto ne'e la'ós povu mak hili ami, ne'e duni pedidu ne'e ami la aseita," nia subliña
PUBLISIDADE