"Ha'u mai atu lori hela despaxu no entrega hela knaar ba presidente Tatoli nian ne'ebé agora husu ona rezignasaun. Ha'u mai atu hato'o hela katak ita iha fali Prezidente Interinu atu asume interinamente to'o ita hetan Prezidente ida," dehan nia, iha edifísiu Ajénsia Tatoli IP. Faról, Tersa (1/09).
Governante ne'e hatutan, Manuel sai hanesan prezidente interinu to’o Dezembru 2020, aumezmu tempu hanesan vise-presidente atu kaer knaar ne'e to'o hetan fali nomeasan prezidente ezekutivu.
"Ha'u lakohi foti ema husi li’ur tanba ha'u lakohi mai ho sala adaptasaun. Ha'u hakarak ema servisu iha ne'e, hanesan mós kadernizasaun ba hotu-hotu iha Tatoli rasik, nune'e bele hahú ona kaderniza atu ita lalika tau kritika demais ba sasán sira ne'e," tenik nia.
Nia informa, hakarak ema ne'ebé maka iha poténsia ba halo servisu ho knaar sira ne'e, no fó fiar ba sira atu bele hala'o knaar ho kapasidade ne'ebé sira iha atu bele dezenvolve Tatoli di'ak liu iha futuru.
Ministru esplika, problema preferénsia ne'e nia tenke halo estudu barak atu bele hatene di'ak, tanba presiza ema atu servisu, presiza ema ne'ebé iha ona esperiénsia no kapasidade atu lori Tatoli ba oin.
Iha fatin hanesan, Prezidente Interinu, Manuel Pinto hateten, tenke garante fila-fali jestaun esterna no interna ba Tatoli ninian no halo oinsá para asegura planu no programa iha instituisaun ne’e.
"Oinsá Tatoli sai ajénsia ne'ebé kualidade no kredivel ba iha nasionál tantu rejionál no internasionál. Atu sai kualidade no kredivel ida ne'e ami fahe ba ami nia meta ne'ebé kada tinan-tinan ne'e iha 2019 ami bolu dezenvolve Tatoli, iha dezenvolve Tatoli ne'e mak uluk Tatoli mai ho ema na’in hitu, maibé agora 40-ital ne'ebé servisu", tenik nia.
Nia informa, sira evolui Tatoli sai forte no nafatin halo servisu bazeia ba retiru ka target meta ne'ebé sira define ona iha sira-nia planu bá iha prazu husi 2019 to’o 2022 ne'e no sei konsentra oinsá mak Tatoli sai forte no modernu. (*)