Projetu deliberasaun ne'ebé Konsellu Ministru aprova ne'e aprezenta husi Vise-Ministra Finansas, Sara Lobo Brites.
"Projetu deliberasaun ne'e, kona-ba tetu agregadu no dezagregadu ba Orsamentu Jerál Estadu ba tinan 2021 nian ho montante ba tetu agregadu hamutuk biliaun US$ 1.6 ", dehan Ministru Prezidénsia Konsellu Ministru, Fidelis Leite Magalhães, iha Palasiu Governu, Kuarta (2/9).
Orsamentu ho montante biliaun US$ 1.6 ne'ebé tau ba tinan 2021 ne'e atu kobre ba nesesidade programa no prioridade nasionál sira ne’ebé define husi VIII Governu Konstitusionál.
Prioridade liu ba nivel dezenvolvimentu kapitál sosiál, dezenvolvimentu ekonómika, aliñadu ho medida sira ne’ebé integra iha Planu Rekuperasaun Ekonómika, dezenvolvimentu infraestrutura bázika fundamentál, dezenvolvimentu ambientál, dezenvolvimentu institusionál no prosesu reforma institusionál ne’ebé la’o hela. (*)