"Ha'u laiha dúvida ba OJE 2021, sei pasa," Marí Alkatiri hateten ba jornalista sira iha edifísiu Ministériu Públiku (MP) Kolmera, Sesta (6/11).
Marí mós dehan, maske la hola parte iha governu da-ualu, maibé partisipa no lidera retiru governu nian iha edifísiu UNTL Politékniku Hera, tanba hetan konvite husi Primeriu Ministru (PM) Taur Matan Ruak.
"Ha'u hetan konvite husi PM, entaun ha'u partisipa. Ema kuandu konvida, ita ba, ema husu ita-nia opiniaun, ita fó," Alkatiri hateten.
Entretantu, daudaun ne'e Parlamentu Nasionál liuhusi komisaun sira hahú ona halo audiénsia públiku ho Ministériu sira kona-ba OJE 2021.
Orsamentu Jerál Estadu 2021 ne'ebé governu entrega ona ba PN iha loron 15 Outubru hamutuk billaun $1.895 ne'ebé sei aloka ba Kapitál Menór, Kapitál Dezenvolvimentu, Bens no Servisu, Saláriu no Vensimentu no Transferénsia Públika.