“Há, ha'u kontente loos ne'e, se maun sira tur hamutuk ne'e alin sira kontente ga, ne'e alin ne'ebé la kontente kuandu nia maun sira tur hamutuk, ha'u hanesan alin, maun sira kuandu tur hamutuk ne'e, ha'u kontenénsia de'it”, deklara Taur iha Palásiu Prezidensial Bairo Pite, kinta (11/08).

Nu’udar alin ida prontu hato'o kontenénsia ba maun sira tanba ne'e, fasilita ona alin sira-nia moris.

“Se la'e ne'e orsida ita hili, tuir ida-ne'e mak di'ak ka tuir ida ne'ebá mak di'ak. Tuir ida-ne'e sira hirus ita, tuir fali ida ne'ebá, ida ne'ebá mós hirus ita, ita dala-ruma fahe-an la di'ak, e hanoin sira hamutuk fali ita ba loos oin de'it”, hatete nia.

Tanba ezemplu ida mak kona-ba jornalista, dalaruma mós sira iha hanoin hanesan ne'e, hili tuir ida-ne'e ka tuir ida ne'eba.

Tanba ne'e líder Nasionál sira hamutuk bele dehan ema hotu bele tuir dalan loos de'it no sei laiha tan vigansa no oin buis ba malu, no sei haree malu ho hamnasa.

Antes ne'e, Sekretáriu Jerál Partidu FRETILIN, Mari Bim Amude Alkatiri, prontu hala'o diálogu ho líder nasionál sira oinsá buka dalan di'ak ba jerasaun foun sira atu hakat ba oin.

“Sei iha pontu espesifiku mais ha'u labele temi, tanba ha'u foin ko'alia ho doutor Ramos Horta hanesan Prezidente Repúblika, hothotu hatene ona katak ha'u-nia vontade atu ko'alia ho líder hothotu atubele hetan dalan ida ke imi hothotu simu, hakat ba oin”, hatete nia iha Palásiu Prezidensial Bairo Pite, tersa (08/08).

Ba inisiativa ida-ne'e, dala-ruma mídia sira la fiar katak Mari Alkatiri ba hasoru Prezidente Repúblika maibé realidade agora hasoru duni iha Palásiu Prezidensiál.

“Ohin iha ne'e la fiar katak ohin ha'u atu mai, mais ha'u iha ne'e. Doutor Ramos Horta horbainruak hatete dehan nia hakarak ba vizita ha'u iha ha'u-nia oficce, ha'u dehan la'e, ita-boot mak Prezidente Repúblika ha'u mak ba Prezidénsia vizita ita-boot, entaun, ha'u mak mai”, hatete nia.

Hanesan mídia no jornalista sira akompaña situasaun no hatene ona Alakatiri wainhira la konkorda, mak nia foti kedas inisiativa ida atu halo diálogu.

Tanba haree mós ba situasaun polítika ne'ebé la permite atu halo diálogu agora maibé fiar katak agora ne'e tempu ona atu halo reflesaun, tau hanoin atu hothotu bele tur hamutuk hateke ba oin.

“Ha'u lakohi mensiona naran ema se de'it, mais hothotu hatene katak rai ida-ne'e sei presiza ami, mais rai ida-ne'e mós sei presiza ami atu hamutuk. Sé agora ha'u dehan data ha'u halo buat sira ne'e, entaun diálogu sei la akontese, ha'u dehan ha'u lakohi sé temi naran, ita-boot mai temi naran fali tanba saida”, hatete nia.

Dadaun audénsia ne'ebé halo ho Prezidente Repúblika ne'e ko'alia asuntu barak tanba rai ne'e presiza líder hotu ko’alia ba malu, atu buka solusaun ida sustentável.

Tanba Líder nasionál sira-nia idade kuaze 70-resin ona, entaun tempu ba sira mak tinan lima de'it, karik iha tinan lima de'it sei la menus ona, atu hadi'a saída mak estadu tenke hadi'a.

Maibé tenke hamutuk atu husik hela ba jerasaun aban bainrua, atu situasaun ida labele todan demais, atu jerasaun foun, oan, bei-oan, bele hanoin, ba kotuk karik bele dehan loos duni, aman no avó sira, balun ukun-an ba mate, balun hahú servisu maka’as, balun ho intendimentu nesesáriu, atu husik ba jerasaun atu banati tuir.

“Tenke banati tuir sira, ou la banati tuir sira mós ne'e tuir sira-nia vontade, mais prontu ami ko'alia situasaun barak tebes”, afirma  nia.

Iha tinan 20 nia laran, labele dehan Timor-Leste tenke halo buat hotuhotu ka tenke halo loos hotu, maibé hanesan ema moris iha tinan 20 nia laran, seidauk iha esperiénsia atu hari’i Estadu, maibé konsege halo duni, maske la halo buar barak, tanba ne'e tenke hatene katak, tempu ona atu líder sira hanoin ba kotuk, maibé atu hateke ba oin. (*)