Branco dehan, kazu eis Ministra Finansas (MF), Emília Pires no Vise Ministra Saúde (MS), Madalena Hanjam nian ne'ebé to'o oras ne’e laiha ona informasaun ruma, parte justisa, la’ós tanba Tribunál Rekursu laiha kapasidade, maibé tanba iha influensia polítika mai husi líder polítiku balun.
"Kona-ba personajen sira ne'e, ha'u hanoin influensia polítika maka'as liu ba sistema jurídiku iha Timor-Leste", Francisco Miranda Branco hateten ba jornalísta sira iha PN, Segunda (11/16).
Nia dehan, bainhira hare fila-fali ba kotuk, uluk governu Timor-Leste kontrata juis hamutuk na'in-40 atu mai ajuda juis no prokuradór timoroan sira hodi servisu hamutuk, parseria, halo akompañamentu na sira, hodi avalia sira nia kapasidade servisu atu bele ajuda juis timoroan sira bele servius ho di'ak no aumenta tan sira nia koñesimentu.
"Sé prosesu oan ida, governu deside katak ida ne'e tenke sai, ita konvida tiha ema mai, ita duni sai fali ema, liuhusi rezolusaun ida Parlamentu nian", nia dehan.
Maske nune'e, nia hatutan, rezolusaun ida ne'e rasik mós la diskute iha PN, la'ós ajenda ne'ebé lider bankada sira mak diskute hodi tama ajenda, maibé ajenda ida mai husi governu husu PN aprova rezolusaun ida ne'e hodi duni sai juis sira.
"Katak laiha seriedade, laiha vontade polítika atu hari'i instuisaun ida importante, justisa, tribunál sira ho di'ak hodi halo administrasaun justisa nian ho loloos", Branco hateten.
Tuir nia, juis sira na'in-40 refere iha formasaun ne'ebé di'ak, tanba formasaun ida kapas, kontrata juiz sira na'in-40 kedas hodi servisu hamutuk ho Juis timoroan sira.
Nia hatutan, majistradu timoroan sira ne'ebé oras nee iha ona koñesimentu di'ak, tanba kapasita liuhusi avaliasaun parseiru sira nian, atu nun’e bele hadi'a tan nia performansia hodi servi di'ak liu justisa iha TL.
"Maibé, to'o iha dalan klaran, ita rasik duni sai tiha, razaun lahatene saida. Entaun, ida ne'e ba ha'u influensia polítika maka'as ba ita nia sistema justisa", tenik nia.
Tuir Branco, laiha dalan atu lori fila Emília Pires atu submete justisa iha TL, ema iha nasionalidade rua, nia bele buka razaun oioin no bele halo justisa iha sira nia nasaun. (*)
PUBLISIDADE