MAPKOMS dehan, la'ós ida ne'e de'it, maibé bainhira prosesu montajen torre remata, sistema ho komunikasaun manual ho meius parabola mós sei la presiza tan ona atu utiliza, tanba uza de'it kartaun dijitál bele asesu ona informasaun husi kanál oioin.
Nia esplika, programa governu konstitusionál da-ualu nian mak hakarak atu lori informasaun ba ema hotu-hotu, la'ós de'it iha sidade, maibé ema ne'ebé hela iha foho leten, iha fatin ne'ebé de'it, iha área rurál, sira iha direitu hanesan atu hetan informasaun.
Iha munisípiu Likisá, nia hatutan, sei halo montajen ho rihun 30 sheet bock ne'ebé sei kobre mós ba Dili, Manatutu, Bobonaro oitoan, Ermera no Aileu, sira sei hetan sorin-balu, ida ne'e katak komunidade ne'ebé hela iha área rurál, la presiza sosa parabola atu hetan televizaun.
“Sira asesu ba kanál oioin de'it iha ne'ebé kontein iha ne'e, sira bele asesu ho de'it dizitalizasaun katak tau de'it antena dizitál ho Sheet bocks ne'ebé bolu dehan remot, ho kartaun iha laran sira book televizaun mai ona, la presiza tan uza parabola”, MAPKOMS Francisco Martins hateten ba jornalísta sira iha PN, Segunda (16/11).
Nia hatutan, ho diverisifikasaun sistema komunikasaun ida ne'e, bele hamenus ona kustu ba komunidade ne'ebé hela iha nivel baze atu lalika preukupa sosa parabola, la presiza hola ona.
Entretantu, tinan 2021 governu liuhusi MAPKOMS sei harii tan torre 6 iha munisípiu Bobonaro, Ermera, Ainaro, Baukau, Lospalos, Vikeke hodi kobre fila-fali área sira ne'ebé maka seidauk asesu.
Iha tinan 2022 sei hari'i tan 6, torre rua iha RAEOA, 4 iha Suai, no 2023 sei hari'i tan munisípiu ne'ebé seidauk monta iha timor laran tomak.
“Maibé bele dehan katak bainhira ne'e kuandu hahú, kala Likisa sira maka hetan uluk inklui Kutulau, Bazartete, Maubara, sira hetan uluk ona, maibé ida ne'e maka governu hakarak oferese fasilidade sira ne'e liu-liu iha área komunikasaun nian ba iha ita nia komunidade”, nia hakotu.(*)
PUBLISIDADE