Sekretaria Meza Parlamentu Nasional (PN) Lídia Norberta hateten, ajenda ba membru parlamentu atu hili nia reprezentante iha Conselho Imprensa, lider bankada sira aseita ona atu hala'o plenária iha segunda semana oin.
"Liu husi reuniun lider bankada, deputadu hotu-hotu konkorda ona atu realiza plenaria iha segunda 11, ho ajenda eleisaun ba membru Conselho Imprensa, tanba ajenda ida ne'e kleur demais ona," Lídia hateten liu husi konferénsia Semanál iha PN Sesta (8/1).
Lídia hatutan, meza PN mós fó ona orientasaun ba bankada sira hotu hodi prepara sira nia lista kandidatura tenke ema jurista, hodi bele ba kompete iha eleisaun ne'e.
Kona-ba legalidade eleisaun ne'e, Deputada lídia haktuir, iha lei numeru 5/2014 komunikasun sosial, artigu 45 hateten klaru iha ne'ebá katak, PN sei hili ema na'in rua ba membru CI, maibe husi ema na’in rua ne'e obrigatoriamente tenke jurista. (*)