Moras covid-19 dadaun ne’e fó ameasa ba nasaun sira iha mundu inklui Timor-Leste, tanba loroloron númeru kazu pozitivu aumenta nafatin.
Ho ida ne’e, MAPKomS fó orientasaun ba mídia sira, liuliu Radiu Televizaun Timor-Leste, emprezáriu públika (RTTL ep), Ajensia Notisioza Estadu Timor-Lest, instituisaun públika (TATOLI,ip) no radiu komunidade sira.
Maibé mídia privadu sira mós iha papel importante atu fó sai informasaun ne’ebé ajuda governu hodi funu too tempo hakotu pandemia Covid-19 ne’ebé iha ona transmisaun komunitariu.
“Fó orientasaun ba sira oinsá mak haree espasu, atu reforsa no fó atensaun máximu ba informasaun moras Covid-19 ne'ebé ohin loron fó ameasa boot ba mundu tomak inklui Timor Leste”, dehan Francisco Martins da Costa Pereira Jerónimo iha palasiu governu hafoin enkontru ho dirijente TATOLI,ip no RTTL,ep, sesta (19/03).
Mídia sira mós presiza interven hodi kombate informasaun falsa( Hoax) kona ba moras covid 19 nia, nomós ba vasina AstraZenica ne’ebé fó sai katak perigu ba ema nia moris.
"Mídia sira tenke informa lolos ba komunidade, atu nune'e komunidade sira bele akompaña no sira mós bele halo prevensaun ba sira-nia an rasik no oinsá mak sira bele iha konfiansa ba Organizasaun Mundial Saude (OMS) hodi la bele fiar iha informasaun falsa, ne'ebé lansa iha mídia sosiál”, afirma Ministru. (*)