Deputadu Bankada Fretilin,David Dias Ximenes, ho deputada bankada CNRT, Maria Fernanda Lai, husu ba governu atu transporta estudante sira ne'ebé iha Dili ba munisipiu tanba tuir informasaun katak estudante barak mak hamlaha ba ai-han.
Ba kestaun ne'e Ministru Franscisco Jeronimo hatete, ba estudante sira ne'ebé husu atu fila ba Munisípiu iha nia parte haree katak estudante maioria mak fila ona.
"Relasiona ho estudante sira ne'ebé husu atu filafali ba sira-nia Munisípiu, ha’u hanoin estudante barak mak ba ona sira-nia Munisípiu, la'ós hotu maibé barak mak ba ona, iha Dili sei iha maibé la'ós hanesan uluk ona, tanba uluk barak liu do que agora”, dehan Francisco Martins Jerónimo iha plenária PN, segunda(17/05).
Karik estudante sira iha poblema kona-ba ai-han, iha tempu liuba ne'e ai-han haruka ba ona iha universidade hothotu, entaun sira iha komunikasaun ho universidade ka lae.
“Karik ida ne'e seidauk bele hatete filafali para ami, para bele haruka tan ai-han ba universidade atubele fornese ba sira, tanba ami labele lori tama sai ba kost idaidak, maibé organiza di'ak liu ne'e mak ba universidade tanba sira ba kampus, no ita halo hanesan iha fulan kotuk liu ba ne'e”, afirma nia. (*)