“Prioridade ida entre prioridade sira seluk iha ministériu mak tenke hadi’a uma laran, tanba ne'e mak ejisténsia Gabinete Inspesaun nian atu asegura hodi halo kontrolu internu ho kualidade, liliu akompaña funsionamentu hosi servisu sentrál nian no organizmu sira ne’ebé tutela ba Ministru”, dehan Ministru Francisco Jerónimo hafoin sorumutu ho Gabinete Inspesaun hodi rona aprezentasaun hosi Inspetór ho ekipa iha Palásiu Governu, kinta (10/06).
Tanba ne’e, Gabinete Inspesaun tenke tau atensaun uluk ba organizmu sira ne’ebé tutela ba MAPKomS, hanesan RTTL.ep, no husu atu hatudu rezultadu servisu, no rezultadu servisu ne'ebé iha bele transmite fali mensajen ba organizmu sira, administrasaun direta MAPKomS nian, no assegura funsionamentu lolos hosi servisu no organizmu sira ministériu nian
Entretantu husu ba ekipa Gabinete Inspesaun atu tun terenu halo inspesaun labele julga ema maibé atu halo servisu no propoin medida sira ne’ebé los atu adota.
“Tun ba halo inspesaun no auditória ruma, labele ba julga ema, maibé atu ba deteta iregularidade ruma ka inkumprimentu ba lei, prosedimentu ka regra sira, atu nune'e propoin medida sira ne’ebé los atu adota, karik deteta iha indísius krime ruma, husik ba instituisaun kompetente sira seluk mak haree”, dehan nia.
Iha fatin hanesan, Inspetór Gabinete Inspesaun, Orlando da Conceiçao hatete, enkontru ne’e halo atu aprezenta kona-ba prioriodade sira relasiona ho servisu Inspesaun no Auditória nian ne’ebé mak sei hala'o iha segundu trimetre to'o trimestre dahaat tinan 2021.
“Nnune'e mós aprezenta preparativu sira relasiona ho servisu inspesaun no auditória sira ne’ebé sei hala'o uluk ba organizmu sira ne’ebé tutela ba MAPKOMS hanesan, RTTL.ep”, afirma nia.
Iha oportunidade ne'e, ekipa hosi Unidade Servisu Inspesaun no Unidade Servisu Auditória Interna, aprezenta mós giaun servisu ba RTTL.ep, ne’ebé sei hala'o iha tempu badak atu verifika lejitimidade, legalidade no regularidade ba aktu, faktu no prosedimentu administrativu, dezempenu rekursu umanu nian. (*)