Diverjensia ne’ebé eziste iha uma fukun ne’e mak, foin mak tama iha diSkusaun loron dahuluk, bankada opozisaun FRETILIN hahu lansa ona nia pozisaun politika katak sei vota kontra total pakote lejislasaun hirak ne’e, no sei vota kontra sistema ukun ne’ebé nakonu ho tirania.
Tama ba diskusaun loron daruak nian, deputadu sira hosi bankada opozisaun FRETILIN kontinua firme ho sira nia pozisaun, durante sesaun diskusaun mós sempre deklara kontra no dúvida hela de’it kona – bá assuntu ne’e rasik.
Ho kestaun ne’e, xefe bankada CNRT, deputadu Duarte Nune’es katak, pozisaun opozisaun FRETILIN desde uluk kedas sempre vota kontra hela de’it buat hotu – hotu iha rai laran, no sempre Walk Out hela de’it.
“Uluk kedas sira hakarak dada Pipe Line ba Australia. Uluk kedas, la’ós foin. Sira hakarak entrega kedas ba Australia mak halo perfurasaun ba mina tasi Timor, ne’e uluk kedas, la’ós foin,” hatete deputadu Duarte ba Tempo Timor iha Parlamentu Nasionál, Dili, Kuarta (17/07).
“Sira uluk kedas sempre vota kontra no Walk Out. Ita komprende politika opozisaun sira nian, maibé AMP la hakfodak no la sente ameasadu ho pozisaun FRETILIN nian, tanba ami maioria hela ne’e,” afirma deputadu Duarte.
Entretantu, Vise Prezidente Parlamentu Nasionál, Maria Angelina katak,
bankada Fretilin mak vota kontra iha proposta de lei ne'e laiha lójika
"Atu garante ba kompañia operadór ne'ebé halo hela operasaun iha kampu Bayu Undang no ba futuru karik sira halo operasaun iha iha kampu Greater Sun Rise depois de asina tratadu fronteira marítima. Entaun prosesu ne'e ajusta de'it husi akordu sira ne'ebé hala'o ona husi akordu CMATS nian," esplika deputada Maria.
"Sira (Fretilin) vota afavór iha fronteira marítima maibé sira (Fretilin) vota kontra ba iha proposta de lei ne'e, ba ha'u laiha lójika, tanba buat rua ne'e iha inteigadu ba malu, ne'ebé laiha ida mak ketak husi ida," nia afirma.
Iha loron Tersa (16/07), bankada FRETILIN liuhosi konferensia imprensa katak, sei VOTA KONTRA PAKOTE LEJISLASAUN TOMAK ne’ebé VIII Governu entrega ba Parlamentu Nasionál iha semana kotuk, atu halo alterasaun ba lei sira ne’ebé relasiona ho Tratadu Fronteira Marítima.
“Bankada Parlamentár FRETILIN hare katak hahalok ida ne’e hatudu momós VIII Governu Konstitusionál hakarak atu lori dadaun Timor-Leste ba ukun ditadura ida nia okos iha ne’ebé hamihis ka halakon tiha respeita ba Konstituisaun no lei sira. Muda Lei atu implementa vontade ema ida nian. Halo Estado tomak atu hakru’uk ba ema ida deit nia vontade,” deklara Prezidente Bankada FRETILIN Deputadu Aniceto Guterres Lopes iha sala bankada FRETILIN, Parlamentu Nasionál, Dili.
Antes iha dia 8 -9 de Jullo Konsellu Ministru aprova ba alterasaun dahuluk mak Lei n.8/2008, loron 30 fulan-Juñu, Lei dahuluk n.3/2003, loron 1 fulan-Jullu kona-ba tributasaun ba kontraentes husi Bayu-Undan no alterasaun dahuluk ba Lei n.4/2003 loron 1 fulan-Jullu, kona-ba dezenvolvimentu husi petróleu Tasi Timor. Proposta husi Lei ne’ebé aprova altersaun daruak mak Lei n.13/2005, loron 2 fulan-Setembru, ne’ebé mak aprova hanesan Lei husi Atividade Petrolífera no Proposta husi Lei ne’ebé aprova husi alterasaun datolu mak Lei n.9/2005, loron 3 fulan-Agostu, ne’ebé aprova hanesan Lei Fundu Petrolífero.