Ministru ba Asuntu Parlamentár no Komunikasaun Sosiál (MAPKOMS), Francisco da Costa Pereira Jerónimo, hato’o kompromisu ne’e bainhira hala'o abertura ba semináriu nasionál ho tema “Asesu no Komunikasaun Ida Inkluzivu no Asesivel ba Sidadaun Timor-Leste no Asembleia Jerál ba Estabelesimentu Rádiu Komunidade Defisiénsia”, kinta (29/07), iha salaun Ministériu Transporte no Komunikasaun (MTC), Kaikoli, Dili.
Pozisaun governu rekoiñese, sidadaun hotu iha liberdade espresaun no liberdade imprensa, inklui Asosiasaun Defisiente iha Timor-Leste.
Ho ida ne'e, Asosiasaun Defisiénsia iha direitu tomak atu hari’i rádiu komunidade ida ba ema ho defisiénsia hanesan hatuur ona iha Konstituisaun RDTL, liliu kona-ba direitu ne’ebé atribui ba ema ho defisiénsia hanesan ho sidadaun sira seluk no Governu ne’ebé de’it mak kaer ukun iha obrigasaun atu fó protesaun no atensaun ba sira.
"MAPKOMS hein katak liuhusi semináriu nasionál ne’e bele hamosu estatutu no orientasaun ne’ebé loloos hodi define kna’ar ba jestaun rádiu komunidade ne’ebé sei hari’i ho di’ak, maibé presiza haree mós ba ninia sustentabilidade iha futuru”, afirma nia.
Husi planu hirak ne'e, Ministériu Asuntu Parlamentár no Komunikasaun Sosiál hato’o kongratulasaun ba ADTL tanba konsege organiza realizasaun semináriu nasionál ne’e hodi ko’alia kona-ba futuru rádiu komunidade defisiénsia. (*)