Maske iha situasaun ne'e, públiku hotu krítika covid-19 ne'e dehan Governu mak politiza maibé Governu la politiza tanba covid-19 ne'e nu’udar pandemia global ne’ebé afeta ba mundu tomak.
"Situasaun ida covid ne'e laiha Governu ida mak hakarak atu oho ninia povu, nomós ba Governu la manán buat ida hodi politiza covid ida ne'e”, dehan nia iha debate Renovasaun Deklarasaun Estadu Emerjénsia (EE) ba dala-19, iha plenária Parlamentu Nasionál (PN), tersa (26/10).
Tanba ne'e, husu ba sidadaun hothotu, la haree ba forsa boot ka partidu saida, maibé importante mak hothotu hamutuk atubele ultrapasa covid-19 ida ne'e para situasaun iha rai laran bele filafali ba normálidade.
"Ita hirak ne'ebé polítiku bele disputa politika iha futuru mais situasaun ida agora ne'e, enfelismente ita tenke ultrapasa ou haksoit liu para ita bele garante katak ita-nia populasaun la mate”, hatete nia.
Deputadu Bankada CNRT, Gabriel Soares, konsidera Estensaun Estadu Emerjénsia ba dala sanulu resin-sia (XIX) ne’e halo Timor-Leste tama iha lista Estadu Emerjénsia naruk liu iha mundu, mezmu efeitu husi Covid-19 iha nasaun balun maka’as liu Timor-Leste dala atus-ida.
"Iha deklarasaun Estadu Emerjénsia dahuluk nian, iha fulan Marsu 2020, Bankada CNRT deklara tiha ona ba públiku katak polítiku sira ne’ebé iha ambisaun ba podér sei uza Estadu Emerjénsia atu halo asaltu ba Konstituisaun da Repúblika hodi hadau podér. e deklarasaun ida ne’e agora sai realidade”, dehan nia.
Tanba, bankada CNRT lembra iha loron 19 Maiu 2020, iha períodu Estadu Emerjénsia daruak nian, bankada-tolu viola Konstituisaun no Rejimentu Parlamentu nian hodi halo asaltu podér no sobu kompozisaun meza Parlamentu Nasionál nian. (*)