“Ha’u nu'udar membru Governu ko'alia ona ho Primeiru Ministru Taur Matan Ruak, realasiona ho informasaun hirak ne'e, maibé Primeiru Ministru hatete ba ha'u katak nia nafatin iha konfiansa mai ha'u atu halo atividade no hala'o knaar nu'udar Ministru hanesan baibain, ida ne'e mak ha'u simu”, deklara Ministru Francisco Martins, iha edifisiu CCF, Komoro, tersa (09/11).
Tanba ne'e, informa ba públiku katak iha terseira pesoál sira mak hakarak fomenta naruk no lori informasaun hirak ne'e ba oin maibé tuir realidade la akontese hanesan ne'e.
"Hakrak atu hato'o ba públiku hanesan membru Komité sentrál katak, hahú husi tempu orseik no ohin ne'e iha mídia sosiál namkari informasaun ne'ebé mak dala barak ema hanoin katak buat sira ne'e informasaun los hotu ne'ebé afeita mai ha'u, maibé atu hatete ba hothotu katak informasaun ne'ebé lansa no buat hothotu ne'ebé ko'alia iha mídia sosiál ne'e laiha faktus”, afirma nia.
Nune'e mós nu'udar membru Komité sentrál, hasoru ona Sekretáriu Jerál Partidu FRETILIN, Mari Alkatiri hodi informa kona-ba informasaun husi ema irresponsabilidade ne'e, maibé Sekretáriu Jerál nafatin fó konfiansa hodi hala'o atividade hanesan baibain:
"Ha'u rasik hasoru ona xefe partidu ninia, kamarada Sekretáriada jerál Mari Alkatiri, ha'u ko’alia ho nia no konta buat hotu informa buat hotu ba nia maibé nia mós hatete mai ha'u ba halo servisu nafatin, maibé ha'u sente katak di'ak liu ha'u husu atu suspende lai ha'u-nia kna’ar hanesan membru Komité sentrál hodi hein kazu ne'e la'o los hotu ona e ha'u sei asume fila fali kna’ar hanesan membru Komité sentrál”, esplika nia. (*)