Tuir informasaun ne’ebé www.tempotimor.com asesu iha pájina Gabineti Primeiru Ministrus, sesta ohin (26/01) katak,  Primeiru Ministru (PM), Taur Mtan Ruak hamutuk ho Vise Primeiru Ministru, José Maria dos Reis, Ministra Saúde, Odete Maria Freitas Belo, Vise-Ministru Saúde, Bonifácio Mau Coli dos Reis no Sekretáriu Estadu Terras no Propriedades, Eldino Rodrigues dos Santos, reprezentante Embaixada Xina no Kompañia Konstrutora, lansa ona fatuk dahuluk ba prosesu konstrusaun edifísiu foun Pediátriku no Unidade Kuidadu Intensivu, ho andar lima (5) iha Kompleksu Ospitál Nasionál Guido Valadares, Bidau Dili.

Xefe Governu konsidera inisiativa ne’e importante no istóriku tebes hodi moderniza infraestruturas iha Ospitál Nasionál Guido Valadares Dili (HNGV), atu bele fó konfortável ba pesoál saúde no mós   pasiente sira, tanba kuaze tinan naruk kondisaun ladún favorável.

“Inisiativa ida ne’e important no istóriku tebes, i inisiativa ne’e enkuadra husi Ministériu Saúde nian, iha sira nia vizaun ba aban bainrua nian, vizaun ida ne’e integra iha esforsu prepara Master Plan Ospitál Nasionál Guido Valadares no Ospitál Lahane, eh entaun pasu ida ne’e fundamental tebes atu fó pontabeleseu ida, nia esforsu atu moderniza ita-nia infraestruturas saúde”, dehan Taur.

Nune’e, PM Taur mós apresia ho esforsu hosi Ministériu Saúde no parte envolvidu sira ba esforsu halo alterasaun ba dezeñu anterior hodi ikus mai bele realiza.

“Kuandu ha’u tama Primeiru Ministru haree dezeñu anteriór ladún di’ak, ha’u husu para halo alterasoins, eh ha’u hanoin alterasoins ida ne’e, bele lori tempu naruk loos, eh probabilidade boot liu mak ita labele realiza iha tempu ida ne’e, mas felizmente ho apoiu hotu-hotu liu-liu Ministériu Saúde nian, Profisionais Ministériu Saúde nian ita konsege, eh ha’u hakarak parabeniza tékniku no profisionais sira hotu ne’ebé lakon tempu, lakon enerjia para ké halo projetu ida ne’e, bele lansa ohin”, Taur apresia.

Taur afirma, tempu ona atu investe iha saúde hodi bele atende pasiente sira ho dignidade, tanba dala barak akontese iha sala VIP kuandu membru Governu ruma moras fatin laiha tenke hasai komunidade baibain, eh ne’e hanesan soké ida.

 “Ita hotu nia mehi ida de’it, ha’u nia mehi ida de’it, ha’u nia oan sira uluk moris hotu iha uma ida ne’ebá, ha’u hakarak ha’u nia bei-oan sira moris fali iha uma ida ne’e, agora ita harii ne’e, tanba ha’u hanoin tempu to’o ona, para ké ita investe iha ita-nia saúde, instrusoins ba Ministériu Finansas kontinua mobiliza rekursu finanseiru ba Ministériu Saúde, em espesiál Ospitál Nasionál Guido Valadares, para ké projetu sira prioridade tuir pontu de vista tékniku, tuir Diretór Ospitál no Médiku sira nia rekomendasoins bele implementa nomós hakat ba pasu ida  iha Lahane ho total investimentu ké kuaze atinje 250 milloins de dólar. Pergunta, ita iha osan ka lae? Iha, sé ita halo auto estrada iha Suai kada kilómetru 11 milloins dólar amerikanu, tanba saída ita laiha osan para halo Ospitál ho kondisoins para simu ita-nia pasiente sira”, nia kompara.

Tanba tuir PM Taur nia haree sala VIP, kuandu tempu autoridade sira moras tenke hasai sidadaun sira par Primeiru Ministru mai ka membru Governu ida mai fali iha ne’e, tanba ne’e ha’u hanoin importante loos, pesoalmente hakarak parabeniza Ministra Saúde, Vise Ministru Saúde ba esforsu ba dedikasaun mas espesiál tékniku sira iha Ministériu Saúde, nune’e mós Diretór HNGV ho nia ekipa sira, ita boot sira iha por menor ida ohin, hanesan Ministra Saúde hatete, projetu hahú 10 anos ou 12 anos atrás.

Tnaba ne’e, Primeiru ministru enome governu daualu apela ba Kompañia Konstrutora atu kumpri tempu no kualidade.

“Últimu palavra ha’u hakarak hateten ba Diretór kompañia, ha’u nia pedidu ida, para ita boot sira halo esforsu kumpri prazu, kumpri kualidade ne’ebé ezije ba dezenvolvimentu infraestruturas ida ne’e, ha’u foin daudaun vizita Sua Eselénsia Prezidente Tribunál Rekursu eh ha’u haree konstrusaun ida iha Tribunál nian ne’e sei iha lentidão no dezafiu barak eh sé ha’u la hatene kompañia ne’ebá kumpri prazu? mas ha’u lakohi ida ne’ebá akontese iha ne’e, ha’u nia mensagem mak ne’e, ha’u rekoñese ita-boot sira nia kompeténsia profisionalizmu mas prazu para kumpri, ha’u nia mensajen mak ida ne’e eh ha’u husu ba tékniku sira para ké tau matan prazu atu kumpri, tanba ne’e iha kontratu ona tinan rua para termina, espera ké dois anós Maromak hakarak ita sira balun sei moris liu-liu ha’u karik ita mai halo inaugurasaun”, nia garante.

Edifísiu Pediátriku no Kuidadu Intensivu HNGV ho andar lima ne’e, sei ka’er hosi Kompañia Internasionál Xinéza, China Civil Engenering Construction Coorporation ho durasaun tinan 2, no projetu ne’e mós sei hetan fiskalizasaun hosi Kompañia Konsultan hosi Indonézia, PT. Bennatin Surya Cipta Indonesia ho nia joint venture Rachio Plan Counsultant LDA. (*)