Tempotimor (Díli) – FRETILIN husu VIII Governu atu ezije ba Governu Indonézia hodi hatudu fatin ne'ebé hakoi saudozo Nicolau Lobato. Tanba, to'o oras ne'e, restu mortais husi saudozo Nicolau Lobato, seidauk rekolla.
"Ruin saudozu Nicolau Lobato ne'e, polítika ida ne'ebé Governu tenke halo. Kleur demais ona. Tenke ezije Governu Indonézia, atu jenerais sira bele hatudu restus mortais ne'e iha fatin ne'ebé. Para ita bele hetan no haloot ho di'ak iha fatin ne'ebé propriu," hatete deputadu Francisco Miranda Branco iha bankada FRETILIN, Parlamentu Nasionál, Segunda (02/09/19).
Entretantu, deputadu Adriano do Nascimento husi bankada Demokrátika katak, partidu hotu-hotu iha obrigasaun atu buka tuir saudozu sira ne'ebé lakon sira-nia vida ba nasaun Timor-Leste.
"Partidu hotu-hotu iha obrigasaun, atu buka tuir saudozu sira nia ruin ne'ebé ita seidauk hetan. Inklui mós kamarada Nicolau Lobato, Mau-Hudu, David Alex "Daitula" no sira seluk tan," dehan Adriano.