Tempotimor (Dili) – Program Officer ASIA Justice and Rights (AJAR), Inocencio Xavier konsidera átu Parlamentu Nasionál (PN) ne'ebé ba dahituk ona kansela viajen Prezidente Repúblika ba rai liur, tanba la kompriende didi'ak substánsia estadu.  

"Haree katak kapasidade Parlamentu Nasionál liuliu iha V legislatura mukit tebes. Seidauk kompriende didiak substansia de estadu. Tanba seidauk separa didi'ak polítika estadu no uma laran," hatete Inocencio iha nia knaar fatin, Farol, Dili, Tersa (01/10/19).

Nia afirma, halo impedementu ba viajen PR nian hatudu momoos katak, PN laiha kapasidade atu jere problema ida ne'e, hodi difikulta ba sentidu estadu.

"AMP rasik mak manifesta hodi hatudu ba nasaun sira seluk katak Timor-Leste iha problema. Tanba,  ko'alia kona-ba paz no unidade. Maibé, realidade la fó valór ba paz no unidade. Tanba hatudu liuhusi impedementu sira hanesan PR nia viajen," Inocencio esplika.

Nia mós husu ba PN presiza tetu didi'ak atu halo aprovasaun ba PR nia viajen. Tanba, PR nia viajen  ne'e la'ós ba pasa ferias ho familia sira iha rai liur. Maibé, tuir Inocencio, viajen ne'e tanba konvite entre estadu ho estadu. Labele lori maioria hodi viola regras sira ne'ebé PN atu la'o tuir.

"Distintus deputadu sira, presiza hatudu kapasidade kualidade hanesan orgaun de estadu, no sai hanesan reprezentante povu. Tanba kanselamentu ba PR nia viajen fó impaktu ba servisu bilaterál," nia tenik.

Tempotimor (Dili) – Deputada Bankada FRETILIN, Maria Angelica Rangel afirma, hasa'e Orsamentu Jerál Estadu (OJE) ba tinan 2020 ne'e, viola ona regra no sai  istória boot ba Timor-Leste.

"Tanba iha tinan 2016 mós ho orsamentu billaun $ 1.9, maibé orsamentu ne'e mai husi parte rua. Ida mai husi OJE no seluk mai husi orsamentu ratifikativu. Iha tinan 2020 ne'e mak proposta orsamentu mai iha PN ho montante billaun $ 1.95 mai dala ida de'it," hatete deputada Angelica Rangel, Kinta (03/10/19) iha Salão Paroquiál, São José, Katedrál Dili.  

Nia dehan, foufoun desizaun husi Konsellu Ministru katak defini no tetu orsamentu ba tinan 2020 ne'e ho montante billaun $1.6.

“Maibé, ikus mai iha Komisaun Revizaun Orsamentu, hasa'e fali ba billaun $1.95. Ita hatene katak Komisaun Revizaun Orsamentu ne'e, atu tetu loloos para hatún montante OJE ne'e tuir proposta orsamentu billaun $1.6 ne'e. Tanba halo revizaun," esplika Angelica.

Angelica promote, sei hein proposta orsamentu ne'e mosu iha PN para bele halo diskusaun. Maibé, antes ne'e simu ona deklarasaun husi Ministra Finansas, depois hetan aprovasaun iha Konsellu Ministru.

“Ami seidauk iha konkluzaun no halo analiza ba proposta orsamentu ne'e. Tanba, ami seidauk simu proposta OJE 2020. Ida agora ne'e foin akompaña dei't rezultadu depois de reuniaun iha Konsellu Ministru," Angelica dehan.

Tempotimor (Dili) –  Ministériu Transporte no Komunikasaun (MTK) ezekuta Orsamentu Jerál Estadu (OJE) tinan 2019 nian, atinje ona %80.

"Orsamentu tinan 2019 ba Ministériu Transporte no Komunikasaun (MTK) hamutuk US$ 7.628.70 millioens dolares Amérika. Nune'e ezekuta ona US$ 6.102.695.77 millioens ho pursentu %80, bazeia ba free balance," dehan MTK, José Agustino iha plenária bainhira hala'o audiénsia ho Komisaun C, D, E, F Parlamemtu Nasionál, Tersa (29/10/19).

Nia afirma, pagamentu sira ne'ebé hala'o ona mak hanesan pagamentu atuál hamutuk $ 3.965.342.9 ho pursentu 48.44, obrigasaun $ 1.305.819.78 ho pursentu 17.2, komprimísiu $ 1.101.533.90, ho pursentu 14.44," MTK ne'e esplika.

Nia akresenta, balansu ne'ebé sei iha MTK uza pursentu 20 husi pursentu 80 ne'ebé ezekuta ona. "Balansu ne'ebé sei iha hamutuk $ 1.525.374.23 ho pursentu 20," nia dehan

Ministru subliña, orsamentu ne'ebé aloka ba MTK to'o agora natureza servisu nian, ne'ebé rekolla taxa ba Governu, liuhusi diresaun direta sira hamutuk $ 2.760.435.94 millioens.

“Nune'e totál reseita husi diresaun direta no in-direta sira ne'ebé rekolla taxa hamutuk $ 6.760.38.90 millioens.

Oki & Sally Rummery 

Minister of legislative reform and parliamentary affairs, Fidelis Magalhaes has been caught out in questioning following his claims that minister of foreign affairs and cooperation, Dr Dionisio Babo, was absent from an inauguration last last after failing to receive an invitation to the event.

Tempotimor (Dili) – Bankada Kmanek Haburas Unidade Nasional Timor Oan (KHUNTO) iha Parlamentu Nasionál (PN) husu Governu atu hadi'a setór agrikultura. Tanba, polítika Governu nian mak atu hasai povu husi kiak no mukit.

"Obervasaun KHUNTO nian mak Timor-Leste tenke livre husi merkadoria, mal nutrisaun, livre ba importasaun ai-han liuliu ba foos, no livre ba dependensia ba produtu rai liur," deklara deputadu KHUNTO, António Verdial iha plenária PN, Segunda (30/09/19).

Verdil mós husu Governu atu hatuur baze fundamentál ne'ebé forte, hodi fó dezenvolvimentu ba setór agrikultura.

"Governu TL tenke tetu no hatuur didi'ak baze fundamentál ne'ebé forte hodi halo dezenvolvimentu ba setór agrikultura. Tanba, buat barak ne'ebé mosu iha ita nia rai ohin loron ne'e liga ba saúde, ekonomia no edukasaun. Ne'e hatudu ba ita katak dezenvolvimentu setór agrikultura importante tebes," nia afirma.

Tempotimor (Dili) – Sentru Lojistika Nasionál (CLN), tetu Orsamentu Jerál Estadu (OJE) ba tinan 2020 hamutuk milioens US$ 2.3, inklui mós ho adisionál kuaze milioens US$ 7.

"Ami iha tetu orsamentu ne'e US$ 2.3  milioens. Ida ne'e mak tetu orsamentu ne'ebé ami simu. Maibé, ami iha tan adisionál pur volta milioens 7," dehan Prezidente CLN, Agusto Junior iha Ministériu Finansas aitarak laran, Sesta (13/09/19).

Nia subliña, orsamentu ne'ebé governu prevé ba Sentru Lojistika Nasionál ne'e, ba área importante sira iha CLN.

"Orsamentu hirak ne'e, ba item tolu mak hanesan bens i servisu, ami presiza tau tan osan para sosa hare kulit iha rai laran. Ami presiza halo rekrutamentu ba staff sira, inklui ba kapitál  dezenvolvimentu ne'ebé foka liu ba koopersaun Timor-Leste ho Xina ba projetu iha Baucau no Natarbora, no ikus liu mak kapitál menor," tenik Agusto.

Nia akresenta, kona-ba ekipamensu sira ne'ebé CLN iha kuaze barak mak aat ona, entaun ohin CLN husu adisionál ba Governu, ikus mai hetan apresiasaun ho di'ak.

By : Oki 

Tempotimor (Dili) – Prezidente Kamara Komersiu no Industria Timor – Leste (KKI – TL), Oscar Lima hatete, maske antes ne’e informa ona ba Primeiru – Ministru kona – bá prosesu pagamentu governu nian ba setor privadu sira, maibé seidauk la’o di’ak to’o ohin loron, no konsidera situasaun governu kontinua prejudika emprezariu Timor oan sira nia atividade ekonómiku iha rai laran. 

Emprezariu tuan ne’e kestiona mós lei rai ne’ebé seidauk afavór ba emrpezariu lokál sira, tanba to’o oras ne’e instituisaun finanseira (Banku) sira iha Timor – Leste katak sira sei persija tan dekretu lei ida tan hodi bele fó garantia ba ema nia rai ne’ebé mak sira uja atu ba kréditu osan iha banku sira. 

“Assuntu ne’e importante tebes tanba ita nia emprezariu sira sei la investe iha Timor – Leste bainhira la hetan asesu kréditu baratu hosi ita nia banku sira iha Timor – Leste. Ha’u ko’alia tiha ona ho diretor jeral banku sira ne’e hotu kedas ona, tanba desde uluk kedas ha’u assume kargu ne’e nu’udar Prezidente KKI – TL, ami hili kedas vise ida Rui Castro hodi dedika atensaun tomak ba assuntu finanseiru, maibé banku seidauk fó resposta di’ak ba buat sira ne’ebé ami presija,” Oscar Lima kontinua levanta kestaun ne’e bainhira partisipa iha seremónia Kafé Dader ne’ebé organiza hosi Ministru Koordenadór ba Assuntu Ekonómiku Interinu atual Ministru ba Reforma Legislativa no Assuntu Parlamentar, Fidelis Manuel Leite Magalhães ho estrutura KKI – TL iha Suai Room, Timor – Plaza, Comoro, Dili Sesta (02/08). 

Durante seremónia Kafé Dader ne’e Oscar Lima mós kestiona hikas kona – ba prosesu pagamentu ba emprezariu lokál sira ne’ebé seidauk la’o di’ak to’o ohin loron. 

“Se bele hare tok sistema pagamentu ne’e to’o agora sei paradu hela, ladun la’o ho di’ak. Depois ekonómia iha rai ida kuandu la la’o, no emprezariu sira mós sei iha tusan ho governu ida ne’e problema itoan,” nia rekomenda.

Nia mós konsiente katak, maske Ministru Fidelis oras ne’e assume kargu barak tebes hodi halo nia okupadu tebes ho serbisu sira, maibé nia husu nafatin ba governu atu hadi’ak liutan parseria entre setor privadu ho setor públiku sira iha governu atual. 

“Se ida – idak mak la’o mesmesak, ha’u hanoin ida ne’e susar, tanba pagamentu ne’e iha ligasaun ho kompañia sira, no kompañia balun agora ne’e la aumenta tan ona empregu, maibé hasai (hamenus) hosi serbisu mak iha. Ida ne’e afeta tebes ba ita nia ekonómia iha rai laran,” esplika Oscar. 

Nia mós kestiona desijaun politika governu nian ba investimentu ne’e iha tendensia diskrimina no afavor liu ba emprezariu sira iha rai liur, sira tanba tuir nia katak Timor oan balun hahu halo ona investimentu iha rai laran, maibé governu fó fali oportunidade ba ema hosi rai liur.

“Prinsipalmene mai hosi China, Filipina ka Indonézia. Sira mai loke sasan ne’ebé Timor oan sira halo tiha ona. Ida ne’e afeta tebes ba ita nia ekonómia, tanba ita atu halo kompetisaun ho ema sira ne’e ita lakonsege, tanba sira hetan jurus impréstimu ne’e baratu hodi mai investe kompara ho jurus (funan) ba emprezariu Timor oan sira iha rai laran liu porsentu 20,” nia lamenta.

Hatan kona – bá kestaun ne’e, Ministru Koordenadór ba Assuntu Ekonómiku Interinu atual Ministru ba Reforma Legislativa no Assuntu Parlamentar, Fidelis Manuel Leite Magalhães katak nia ekipa sira toma nota ona no sei informa fali ba emprezariu lokál sira iha tempu badak.

Tempotimor (Dili) – Parlamentu Nasionál (PN), Tersa (17/09/19) aprova iha faze jeneralidade ba Orsamentu Privativa ba Parlamentu Nasionál ho montante tokon US$ 17.9 ba tinan 2020.

Iha debate jeneralidade ba Orsamentu Privativa ne'e, Prezidente Parlamentu Nasionál, Arão Noe de Jesus da Costa Amaral katak, planu inisiál ne'ebé mai husi komisoens sira hotu, submete mai Konsellu Administrasaun PN kuaze tokon ruanulu resin.

"Osan ne'ebé mak submete mai ne'e, kuaze Millioens US$ 20 resin. Ne'ebé, ami konsege lori to'o mai iha Konsellu Administrasaun PN nian, depois konsege halo diskusaun no reduz. Ikus mai hetan millioens US$ 17,9 ba planu orsamentu ne'ebé mak aprezenta iha plenaria hodi debate," dehan Arão Noe iha PN, Tersa (17/09/19).

Husi totál orsamentu ne'ebé PN iha, konsege hetan ona aprovasaun iha faze jeneralidade ba projeitu rezolusaun PN numeru 35/V (II), husi deputadu 51 ho votus a favor 35, abstensun 12 no kontra 4.

Tempotimor (Dili) – Bankada PLP lamenta ho polítika ONG Plan Internasionál (PI) ne'ebé prepara joven feto sira, atu hola parte iha orgaun estadu nian iha oras balun nia laran.

"PLAN Internasionál prepara ona la'ós model hanesan ne'e. Viola regras hotu, buka saida iha ne'e? Plan Internasionál ne'e organizasaun ida, Parlamentu Nasionál iha juventude, Juventude Parlamentar. Agora, ita ema mai ida-idak, ita mai halo orgaun ida ne'e, parte ida ita dignifika estadu, maibé parte ida ladi'ak, nu'udar estadu direitu demokrátiku," dehan Deputadu PLP, Francisco Vasconcelhos iha plenária bainhira Mália da Costa hola pozisaun nu'udar deputada PD, durante oras ida nia laran, Segunda (14/10/19).

Deputadu ne'e la konkorda ho átu ne'ebé mak Plan Internasionál halo. "Ha'u la konkorda ho átu ne'e. Ita labele buka popularidade, depois ita viola regras hotu, ita nia preparasaun ba ita nia joven sira la'ós ho maneira sira hanesan ne'e,” deputadu hatete.

Iha fatin hanesan, deputada Josefa Soares katak hakarak atu dignifika estadu tenke iha regras.

"Ita hakarak atu dignifika estadu ne'e la'ós ho maneira sira hanesan ne'e. Hakarak halo tratamentu bainhira ema, sim señor, Parlamentu Nasionál bele konsede fatin seluk, para sai hanesan treinamentu. Maibé, la'ós iha plenária soberanu ida ne'e. Se ita hakarak dignifika estadu ne'e tenke tuir regras. La'ós ONG ida mai fali iha ne'e no hakat liu fali. Ida ne'e labele," hatete Josefa.

Hatan ba kestaun ne'e Prezidente Parlamentu Nasional (PPN) Arão Noé de Jesus da Costa Amaral katak, asaun ne'e soe ona ba lidera bankada, maibé Laiha pronunsia ruma kona-ba prezensa alin Mália.

"Iha dia 11 Outubru, loron mundiál labarik feto sira. Tanba ne'e, asaun ne'e hahú kedas iha semana kotuk, PR nia halo, PM mós halo, inklui membru Governu balun halo ona.  Tanba ne'e, ohin molok alin ne'e tama mai, ha'u soe ona ba lideres bankada sira. Maibé, laiha pronunsia entaun ita fó alin ne'e mai hola pozisaun hanesan Prezidente Bankada (PD)," dehan PPN Arão.

Tempotimor (Dili) – Prezidente Parlamentu Nasionál (PPN), Arão Noé de Jesus da Costa Amarál informa, proposta Lei Atividade Petrolífeiru (LAP) no Lei Fundu Petrolífeiru (LFP) ne'ebé hetan ona reapresiasaun husi Parlamentu Nasionál, Kinta (10/10/19) loraik sei haruka ba Prezidente Repúblika.

"Lei rua ne'ebé aprova iha Tersa (08/10/19) ne'e, horseik (kuarta) Komisaun C no D inklui tiha ona testu final. Horseik loraik no ohin dadeer ida tama. Ha'u despaxu ona ba Divizaun Apoiu Plenária (DIPLEN) para halo testu finál, para ha'u asina no haruka ba Prezidente Repúblika," informa PPN ne'e iha PN, Kinta (10/10/19).

Arão afirma, prazu ba Prezidente Repúblika hodi estuda no foti desizaun, durante loron tolunulu nia laran.

"Tuir lei loron tolunulu. Durante loron ruanulun nia laran, Prezidente Repúblika se hakarak haruka fali ba tribunal. Depois ba tribunál rekursu iha loron tolunulu nia laran, PR promulga ka vetu polítika," nia esplika.

PPN dehan, bainhira desizaun Prezidente Repúblika sai ona, mak Parlamentu Nasionál ezerse nia funsaun.

Page 1 of 8

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com