Tempotimor (Dili)-Polísia Nasionál Timor-Leste (PNTL) liuhusi Sentru Formasaun Polísia hahú konvida investigadór kriminál husi Munisípiu sira inklui Nasionál hodi halo revizaun kurikulu kualifikadu ba servisu investigasaun kriminál iha Timor-Leste, atu responde servisu no nesesidade povu nian.

Tempotimor (Dili) – Ministru Defeza no Seguransa nomós Ministru Interiór interino, Filomeno Paixão de Jesus deklara presiza hadi'a uluk uma laran PNTL, hafoin halo tan rekrutamentu ba membru foun PNTL.

"Halo rekrutamentu maibé uma laran mak seidauk hadi'a ka la hamoos ne'e sei la halo rekrutamentu. Kuandu la hadia-an, la disiplina, la kumpri direitus umanus, komandu kontrola la loos no la kumpri projetu estratéjiku ne'ebé fó sai ona, polísia tenke iha organizasaun, hierarkia no disiplina tuir militár. Enkuantu buat hirak ne'e la hadi'a, mak sei laiha rekrutamentu," dehan Filomeno Paixão iha Palásiu Governu, Kuarta (25/09/19).

Ministru ne'e afirma, rekrutamentu tinan oin laiha ne'e la signifika la rekruta ona. Maibé presiza hadi'a hotu lai frakeza ne'ebé uma PNTL nia laran, foin halo fali rekrutamentu.

Alende ne'e, Filomeno mós dehan krime barak akontese iha rai laran. La'ós tanba membru PNTL mak menus,  maibé kampu servisu mak laiha.

"Krime sira akontese iha rai laran ne'e la'ós tan polísia mak la to'o. Maibé, krime ne'ebé iha rai laran volume aas ne'e impaktu husi mós edukasaun, ekonomia, agrikultura, empregu sira ne'e laloos mak krimi akontese bei-beik," Paixão esplika.