"Ami la asesu bee-moos ho di'ak, tanba kanu ne'ebé dada husi bee matan ba ami-nia aldeia ne'e aat hotu ona, entaun ami tenke tun foho mak kuru bee hodi sa'e fali ba foho leten, ami la husu buat barak ba Governu, maibé ami husu atu hadi’a netik ami-nia sistema sira ne'e hodi ami bele asesu fali bee-moos ho di'ak”, dehan Reprezentante Komunidade Aldeia Reorema, Suku Liurai, Domingas dos Santos, kuarta (15/09).

Xefe Suku Liurai, Elio Dias Gomes hatete, antes ne'e kanu ne'ebé dada bee husi bee matan ba aldeia sira ne'e suporta husi perseira plan internasionál sira, maibé agora aat hotu tanba kleur ona, nune'e husu ba Governu atu reabilitasaun.

"Ami-nia komunidade balun hela liu iha área remotas no maioria hela iha foho leten hotu no bee matan iha liu foho okos, ida ne'e mós difikuldade boot ida, maibé antes ne'e ita-nia parseiru sira hanesan plan internasionál mak ajuda ona hodi dada bee-moos ba komunidade suku liurai hotu, ne'ebé sistema bee-moos ne'e iha maibé dadaun ne'e barak mak aat, tanba kleur los ona, ne'ebé ami husu Governu presiza halo reabilitasaun”, dehan nia.

Suku Liurai iha mós difikuldade seluk ne'ebé komunidade hasoru mak estrada aat hanesan ligasaun Suku Liurai ba Aldeia Rairemo, Fatubesi, Quirilelo no Laklo.

"Preokupasaun suku nia hirak ne'e, ha'u sempre relata ba parte relevante sira iha munisípiu, ne'ebé espera sira bele hato'o mós ba nasionál nune'e  bele responde preokupasaun sira ne'e iha ami-nia suku”, dehan nia.  (*)