Maske Timor-Leste hahú husi restaurasaun independénsia to’o tinan 2021 komunidade sira iha suku Mausiga, Suru-Kraik, Manetu, Manelobas no Suku Nunumoge seidauk asesu enerjia eletrisidade.

Administradór Munisípiu Ainaro, Leo Vazílio Amaral Pereira hatete, komunidade iha munisípiu Ainaro iha suku 5 presiza hela eletrisidade.

"Komunidade iha munusípiu Ainaro barak mak seidauk asesu ba enerjia eletrisidade ho totál suku 5 mak seidauk asesu mak hanesan suku Mausiga, Suru-Kraik, Manetu, Manelobas no Nunumoge", dehan nia ba Prezidente Repúblika, Francisco Guteres ‘Lú Olo’, bainhira partisipa diálogu iha Salun Parokia Ainaro, kinta (19/11).

Iha munisípiu Ainaro, Postu Administrativu haat (4) hanesan Ainaro, Maubisse, Hato-udo Hato-Builiko, suku 21, aldea 131 ho totál populasaun rihun-neen-resin-lima.

Prezidente Repúblika (PR), Francisco Guterres 'Lú Olo' hatete, problema sira ne'e hatudu prezensa Governu ninian iha komunidade nia leet husi Edukasaun nian, saúde husi produsaun no produtividade nomós asuntu sira seluk Governu nia prezensa sempre hamutuk ho nia povu.

"Governu nafatin iha kumprimisiu boot tebtebes atu ajuda ita-nia komunidade, ajuda imi rasik atubele hetan solusaun ba imi-nia problema e hodi bele hadi’a nafatin moris ita-nia povu ninian no husi investimentu ne'ebé mak Governu rasik kada área ida-idak halo iha ita-nia rai iha Ainaro”, afirma Xefe Estadu. (*)