Reprezentante komunidade Aldea Holba, António da Costa hatete, mota Rai Ketan agora amesa maka’as ba Aldeia Holba, Suku Labarai, Postu Administrativu Suai, Munisípiu Covalima, tanba estraga ona komunidade sira-nia toos no animal.

“Horseik no ohin udan maka’as, mota komesa lori ami-nia toos ektare rua no lori hotu fahi luhan sira ne'e, no agora mota nia distánsia ho ami aldeia Holba la dook ona, distánsia mota ho uma 30 metru hanesan ne'e de’it ona, ne'ebé ami husu governu tenke ajuda emerjénsia ruma ba ami para salva ami-nia vida”, dehan António ba jornalista www.tempotimo.com, segunda (29/03).

Xefe Aldeia Holba, Santiago Marçal husu parte relevantes atu apoiu emerjénsia ba aldeia Holba, tanba udan boot Durante loron rua, mota lori ai boot sira ne'ebé satan neteik bee hodi labele estraga área aldeia Holba nian, maibé obrigadu ai sira ne’e mota lori hotu to’o estraga komunidade sira-nia toos.

"Mota agora ameasa ba komunidade aldeia Holba, liliu uma-ka’in haat ka lima ne’ebé hela besik mota, entaun udan maka’as tan ne'e mota lori uma sira ne'e hotu, ne'ebé ha’u husu parte relevante sira iha munisípiu Covalima, karik bele ajuda emerjénsia ruma para satan netik komunidade aldeia Holba ne'ebé besik mota ninin sira ne'e”, informa nia.

Entertantu observasaun direta husi jornalista www.tempotimor.com iha ternu nota katak udan boot durante loron rua halo mota tun maka’as, estraga komunidade sira-nia to’os no aminal nia luhan ne’ebé besik mota ninin. Mota mós komesa muda besik tan ba uma komunidade sira-nian, ne’ebé fó amesa liután ba komunidade sira-nia uma.(*)