Tuir estudante Pedro da Costa Gomes ne’ebé pozitivu ba Covid-19 hanesan mós vítima ba www.tempotimor.com katak, pesoál saúde ho naran inisiál F halo kedas agresaun liuhusi tebe ba nia, bainhira tun husi ambulánsia atu tama ba izolamentu.

"Horseik iha karantina Polo sira la baku, sira lori ha’u mai karantina Bairru Kosta atu tama sala izolamentu, ha’u foin tuun husi kareta, funsionáriu saúde nian ho naran inisiál F, naran kompletu ha’u lahatene, ne'e atu tebe ha’u-nia hirus matan, miabé ha’u salva aan (tangkis) entaun nia tebe fali kona ha’u-nia kabun, entaun ha’u komesa hakilar ho razaun saida mak tebe ha’u, ha’u moras positivu tan, entaun nia mós nonok de’it, depois maun seguransa PNTL mós haruka ha’u tama kedas ba sala izolamentu," dehan vítima ne’e ba www.tempotimor.com liuhusi via telefone, Tersa (20/4).

Pasiente ne’e sente triste tebes ho aktu funsionáriu saúde nian ne’ebé hatudunia brutalizmu ba pasiente, maske la uza roupa Protection Personal Equipament (PPE).

"Maun ne'e tebe ha’u la uza roupa Covid-19 nian, hodi tebe los ha’u nia kabun, entaun moras positivu ne'e la da’et ba nia ka, tanba ha’u pozitivu Covid-19 nia mai tebe tan ha’u," katak Nia.

Estudante ne’e mós konta katak, hafoin akontesimentu ne’e vítima nia apa mós to'o kedas fatin hodi husu ba saúde ho razaun saida mak tebe nia oan, maibé parte saúde sira nonok no lá hatán buat ruma.

Liga ba asaun ne’e, iha pesoál saudé ida ne’ebé husu atu www.tempotimor.com lebele públika sai nia identidade mós rekoñese katak, estudante ne’e hetan duni agresaun fíziku husi funsionáriu ida husi saúde.

“Ami mós rona katak alin estudante ne’e etan baku, maibé ami la haree ho matan,” dehan pesoál saúde ne’e.

Entertantu jornalista www.tempotimor.com koko konfirma ho diretór servisu saúde munisípiu Covalima Filipe Perreira Lemos, maibé nia parte lakohi fó komentáriu, tanba okupadu ho servisu.(*)