"Arte Marsiais hanesan PSHT no seluk, ita nia ema hotu, foin lalais sira halo gradusaun ha’u asiste primeira vez sira sai warga halo juramentu ba ita nia bandeira, ne'e signifika dezenvolvimentu ida komitivu tebes, maibé presija define nia regras sai desportu", dehan nia hafoin partisipa Simpoziu Nasional, iha Timor Plaza, sesta (18/11).

Alkatiri partisipa iha Simpoziu Nasionál, nu’udar oradór prinsipál hamutuk ho membru paynel na’in-4 hanesan, Eis Sekretariu Estadu SEPAC, Ozorio Florindo, Eis Sekretariu Estadu Juventude no Desportu, Miguel Manetelu, Eis Prezidente CDTL, Afranio Xavier Amaral, no Eis Ministru Negosiu Estranjeiru, Aurelio Cristovão Guterres, ne’ebé mai ho asuntu la hanesan.

Nune'e, husu ba membru organizasaun hotu, atu labele uza arte marsiais ba baku malu no kria inimigu ba malu no la'os hodi halo kompetisaun de'it, maibé tenke sai sentru unidade entre juventude sira.

"Desportu ne'e liga ba ita-nia saúde no atividade lorloron nian no ba konseitu unidade nasionál, tanba ne'e, ha'u dehan, desportu mak sai sentru ba unidade no desportu hanesan realidade ida hodi halibur ita hamutuk, realidade ida bele tau interasaun", tenik nia

Tuir nia, desportu iha pasadu, prezente no future, tanba desportu sai komplimentu inkresimentu integradu ba ema hotu no hola parte iha moris ho saúde fízika no mental, nune’e tenke hatene lolos importánsia husi desportu.

"Loke dalan hodi define desportu komunitaria no muscular hodi dezenvolve, maibé tenke dezenvolve uluk ita nia talentu individual", dehan nia

Sekretáriu Estadu Joventude no Desportu (SEJD), Abrão Saldanha 'Nokosiku' mós orgullu boot, tanba bele partisipa iha simpojiu atu dezenvolve desportu iha Timor-Leste.

"CDTL foti tema ida kona-ba desportu iha Pasadu, Prezente no Futuru, tenke hanoin ba futuru atu avansa ba dezenvolvimentu desportu ne'ebe di’ak liu mak, hahu husi baze iha eskola no komunidade atu lori desportu sai kultura ba ema hotu, nune'e bele harii unidade ida forte ba prestasaun nasional", dehan nia

Tanba, desportu la’os de'it jogu, maibé desportu iha tipu oi-oin, nune’e hahú kombate in-atividade fízika ida ne'ebé bele ajuda hasa'e esperansa ba vida saudavel.

"Simpoziu ne'e, ita bele hetan ideia oinsa halo viagem ida forsa fali iha investimentu área desportu nian hahú husi baze", nia esklarese.

Nune'e, Prezidente Confederasaun Desportu Timor-Leste (CDTL), Macario Sanches, hatete, desde inisiu foin realiza simpoziu nasional desportu ba dahuluk, ohin hamutuk hodi akompaña pensamentu politiku sira atu dezenvolve ba federasaun desportu sira no atu promove CDTL iha Timor-Leste.

"Simpoziu ami realiza hodi hametin CDTL hakbesik modalidade desportu sira no promove mos modalidade kontinua fo hatene ba públiku katak, modalidade sira ne'ebe ita hakarak sai uniku hodi reprezenta CDTL iha eventu sira", nia dehan.

Nune’e, simpoziu ne’e atu halibur hanoin hamutuk atu lori Timor-Leste ba iha prestasaun iha organizasaun hotu ne'ebé halo atividade desportu. (*)