Tuir observasaun jornalista Tempotimor.com iha terenu nota hafoin udan kuaze oras rua nia laran, estrada diresaun Balide no Matadouru difikulta tebes movimentu transporte públiku liliu mikrolet, tanba iha estrada laran nakonu ho bee, fo'er no tahu.
Enkuantu iha diresaun Katedral to'o iha Palasíu Prezidensiál, bee nalihun iha estrada klaran nomós edífisiu Palasíu Prezidensiál nia oin.
Nune'e iha diresaun Komoro nian iha parte Rotunda Nicolau Lobato, nian bee nalihun iha estrada laran tanba iha barrajen kloot bee la bele sulin ba tasi.
Nune’e mós diresaun Tasitolu mosu engrafamentu kuaze oras ida nia laran, tanba tahu no lixu ne’ebé nakonu iha Estrada laran.
Antes ne'e, iha loron 07 fulan-dezembru 2021, Ministériu Transporte no Komunikasaun (MTK) liuhusi Diresaun Nasionál Meteorologia Geofisiku(DNMG) alerta ona ba populasaun Timor laran tomak katak, populasaun sira ne'ebé hela iha área foho husi kosta Súl no Norte Timor nian, atu matan moris neon nain hadook-an husi fatin risku, tanba posibilidade sei mosu udan ho intensidade moderadu to'o forte akompaña ho anin boot, sei hahú husi loron 07 to'o loron 10 dezembru 2021. (*)