“Ita tau osan mais de 100 milhõs ba dezastre naturál, ita akompaña foin fulan tolu liuba mak komesa ona alojamentu aluga uma koz ba ita-nia maluk sira hela ne'e, osan barak tebes la halo programa ne'ebé sira tau, ida ne'e ba ami siknifika ke kestaun de jestaun mak la di'ak, osan iha mais atu hatene hakerek iha surat tahan depois halo iha prátika laiha”, dehan Xefe Bankada Partidu CNRT, Duarte Nunes, iha Parlamentu Nasionál, tersa (12/04).

Dadaun ne'e vítima inundasaun sira tenke terus iha lona laran, balu to'o agora sei nafatin iha parte Hera nian, iha Manleuna mós balun sei iha, iha fatin barak sei iha sai realidade ne'ebé hasoru.

"Ita espera katak depois tinan ida buat ne'ebé osan ne'e sira uza tuir programa ne'ebé iha, ita espera katak buat ne'ebé sira tenta halo ho di'ak para povu ne'e, akontesimentu buat ruma sira bele hetan fatin di'ak", katak nia.

Maibé kona-ba infraestrutura CNRT hanoin iha edifísiu sira ne'ebé abandona ne'e, Governu bele ko'alia organiza atu enkaisa dezastre sira ne'e sira bele akumoda vítima sira iha ne'ebá, duke ba tau ba hela iha lona, depois abandona no barak moris iha lona okos laiha kondisaun liliu ba labarik ne'ebé moris iha lona okos.

"Haree infrastrutura kona-ba dezastre sira ne'e mak ha'u haree seidauk iha planu ida ne'ebé di'ak atu prevene, kria kondisaun para baihira akontese ne'e bele akumoda ita-nia ema sira ne'e ho dignu”, hatete nia.

Deputadu CNRT, Arão Noe hatete, iha orsamentu ratifikativu 2021 tau osan millaun 100 atu responde kalamidade iha 4 de Abril ne'ebé fó impaktu boot ba Timor-Leste liliu iha Dili.

“Problema emerjénsia tenke responde ho emerjénsia, ita halo uma rihun-haat ne'e la'ós tinan ida rua ne'e presiza tinan lima, haat mak hotu, emerjénsia ne'e katak tenke buka ema sira ne'ebé sofre ona ne'e tau nia iha fatin ida ho kondisaun di'ak molok nia atu hetan fatin di'ak ida para nia bele hela, mais ida ne'e la akontese”, haktuir nia.

Entretantu, Deputada CNRT, Maria Fernanda Lay haktuir, kona-ba dezastre naturál eliende millaun $100, sira deteta iha komisaun C katak iha dotasaun todu Governu iha momentu ne'ebá tranfere tan millaun $2.3 ba protesaun sivíl para aumenta tan osan ne'e, no ba polisía nasionál mós purvolta millaun 1 resin.

"Ne'ebé komisaun C mós deteta ita bele ko'alia orsamentu ou programa mais, programa sobu hotu tiha ona ne'ebé ami tenke ba buka tuir osan ne'e halai ba ne'ebé. E bainhira ita ko'alia kona-ba uma provizória nia naran de'it mós uma provizória mais provizória to'o liu tinan ida resin ona”, deklara nia. (*)