“Ami kontente tanba maun boot Prezidente Repúblika nomós maun boot doutor Ramos Horta eis Prezidente, Premiu Novel d Paz bele fó sira-nia tempu atubele hola parte iha semináriu ida ne'e. Maun boot sira ami kontente, kuandu haree de'it ita-boot sira-nia misaun sagradu lori rai ne'e ba ukun-an ami haree ita-boot sira ami kontente, maibé ami kontente liután kuandu ami haree ita-boot sira ko'alia ba malu”, dehan Reitór UNTL iha Kampus UNTL Hera, kuarta (24/02).

Semináriu tema reflesaun nasionál ho esperitu rekonsiliasaun tema ida importante liliu iha ámbitu atu hakat ba eleisaun Prezidensiál presiza ambiente ida kalma, paz no hakamatek.

“Ami iha inisiativa tenta atu lori líder sira mai, maibé prontu pur razaun ida-idak nian sira la mai, maibé sira ne'ebé mai ami agradese tebtebes”, afirma nia.

Tanba objetivu konvida líder nasionál sira hotu hanesan, Xanana Gusmão, Mari Alkatiri, Ramos Horta, Rogerio Lobato, José Luis Guterres, maibé Ramos Horta de’it mak marka prezensa atu hato'o palestra.

“Ramos Horta ami agradese, nia hanesan líder 1975 ida bele mai partilla mós nia hanoin, Ramos Horta sempre ko'alia ba ema hothotu”, haktuir Reitór.

Ba Xanana Gusmão ne’ebé la marka prezensa tanba prekupa ho kampaña Prezidensiál agora, e Xanana desezu semináriu la'o bele di'ak halibur idea atubele uza idea tenta atu hafanun fali servisu hamutuk, kria estabilidade, paz hodi bele dezenvolve rai ne'e ho di'ak.

Prezidente Repúblika, Francisco Guterres 'Lú Olo' agradese ba semináriu organiza ne’ebé organiza universidade ho grupu asosiasaun ida ne'ebé bolu Paz no rekonsiliasaun.

“Ha'u agradese tebtebes ba retória husi Reitór universidade ho asosiasaun organiza eventu ida ne'e, hodi konvida ha'u mai halo abertura, ho tema importante katak atu hala'o rekonsiliasaun no hametin valoris sira ne'ebé maka uluk ita lori”, dehan Lú OLo.

Tanba valór sira ne'ebé Timor-Leste iha liuhusi luta ne'ebé mak la'o hamutuk feto, mane, hodi halo rezisténsia ne'e biar bele mate, terus maibé hakat liu hodi to'o mai ukun-an ohin loron.

“Líder Nasionál sira ne'ebé lakohi tur hamutuk atu ko'alia ne'e sira-nia hanoin postura ida, adves lori postura polítika, ha'u bele dehan ne'e postura polítika, maibé ba ha'u importante liu mak oinsá ita bele lori tur hamutuk, hodi haree problema matak ne'e hira, problema ne'e boot to'o oinsá, laiha problema sem solusaun”, hatete nia.

Ho ida ne'e líder sira tau hamutuk problema, hothotu tur hamutuk, tau problemsa iha meza leten atu diskute, tanba diskute nasaun nia problema, la hanesan diskute problema partikular ida, tanba povu barak nia interese, presiza boa avontade, presiza onestidade, presiza abertura ba malu atu diskute kestaun sira ne'e hotu bele hadi’a rai no povu nia moris. (*)