Prezidente Forum Komunikasaun Valores Nasionál (F-KOVANA), Eladio Faculto hatete, ondra boot tebes ba F-KOVANA ho UNTL bele orsganiza reflesaun ho esperitu rekonsiliasaun konstrui no konsolita Estadu RDTL, maibé la konsege hetan marka prezensa masimu husi líder nasionál sira ne’ebé konvida.
“Ami iha preokupasaun ho maun boot sira ohin la mai partisipa, maibé ne'e la'ós tempu ikus ba ida ne'e, tempu sei mai barak sei partisipa, se karik ami sei hola tan inisiativa hanesan ne'e la'o, ida hothotu sei hakarak atu la'o”, dehan nia iha Kampus UNTL Hera, kuarta (24/02).
Líder prinsipal kuaze maioria la partisipa iha semináriu nasionál ida ne'e, hanesan Xanana Gusmão, Mari Alkatiri, Rogerio Lobato, José Luis Guterres, sira ne'e figura importante tuir los tenke marka prezensa.
“Maibé la mai, la'ós ikus ba ida ne'e, tempu oin mai sei mai, tanba forum komunikasaun valoris nasaun ninia misaun importante ida mak halibur líder sira, halibur opiniaun publik, lori ita-nia sidadaun sira hamutuk, lori konflitu ba iha meza”, afirma nia.
Mágnifiku Reitór, Universidade Nasional Timor Lorosa'e (UNTL), João Soares Martins hatete, sira hakarak líder nasionál ko'alia ba malu nune'e kria ambiente ida kalma no paz iha nasaun Timor-Leste liliu iha ámbitu ekampaña prezidensiál.
“Ami kontente tanba maun boot Prezidente Repúblika nomós maun boot doutor Ramos Horta eis Prezidente Repúblika, Premiu Novel d Paz bele fó sira-nia tempu atubele hola parte iha seminar ida ne'e. Maun boot sira ami kontente, kuandu haree de'it ita-boot sira-nia misaun sagradu lori rai ne'e ba ukun-an ami haree ita-boot sira ami kontente, maibé ami kontente liután kuandu ami haree ita-boot sira ko'alia ba malu”, dehan Reitór iha Kampus UNTL Hera, kuarta (24/02).
Tanba ne’e, realiza semináriu ho tema reflesaun nasionál ho esperitu rekonsiliasaun tema ida importante liliu iha ámbitu atu hakat ba Prezidensiál presiza ambiente ida kalma no paz.
“Ami iha inisiativa tenta atu lori líder sira mai, maibé prontu pur razaun ida-idak nian sira la mai, maibé sira ne'ebé mai ami agradese tebtebes”, hatutan nia.
Tanba objetivu konvida líder nasionál sira hotu hanesan, Xanana Gusmão, Maria Alkatiri, Ramos Horta, Rogerio Lobato, José Luis Guterres, maibé Ramos Horta mesak marka prezensa atu hato'o palestra.
“Ramos Horta ami agradese, nia hanesan líder 1975 ida bele mai partilla mós nia hanoin, Ramos Horta sempre ko'alia ba ema hothotu”, afirma nia.
Xanana Gusmão la marka prezensa tanba prekupa ho kampaña Prezidensiál, maibé desezu nafatin atu semináriu bele la'o di'ak halibur idea hodi uza idea tenta atu hafanun fali servisu hamutuk, kria estabilidade, paz hodi bele dezenvolve rai ne'e ho di'ak.
Prezidente Repúblika, Francisco Guterres ‘Lú Olo’, ne’ebé abertuta ba relesaun naionál ne’e hatete, líder nasionál lakohi tur hamutuk ne'e hanesan sira-nia hanoin, sira-nia postura ida, maibé importante liu mak líder sira tenke tur hamutuk hodi haree problema tanba laiha problema ida mak laiha solusaun.
“Líder Nasionál sira ne'ebé lakoi tur hamutuk atu ko'alia ne'e sira-nia hanoin postura ida, adves lori postura polítika, ha'u bele dehan ne'e postura polítika, maibé ba ha'u importante liu mak oinsá ita bele lori tur hamutuk, hodi haree problema matak ne'e hira, problema ne'e boot to'o oinsá, laiha problema sem solusaun”, esplika PR Lú Olo.
Tanba ne'e, líder sira tau hamutuk problema, hothotu tur hamutuk, tau problemsa iha meza leten atu diskute. Maibé nasaun nia problema, la hanesan problema partikular, tanba povu barak nia interese, presiza boa avontade, presiza onetidade, presiza abertura ba malu atu diskute kestaun sira ne'e hotu, atubele hadi’a rai povu. (*)
