“Atividade Patrimóniu Kulturál Immateriál lidera husi SEAK hamutuk ho parseiru sira seluk no Fundasaun Alola sai mós membru no enkaisa mós programa tinan ida ne'e nian mak Hakbi'it Ekonomia Feto ba oin. Fundasaun Alola sei kontinua realiza atividade sira hanesan ne'e”, dehan Chief Executive Ooffice (CEO) Fundasaun Alola, Maria Imaculada Guterres, iha Salaun Novo Turizmu Dili, segunda (28/02).
Tanba, Tais Timor ne’ebé hetan rekoñesimentu husi The United Nations Educational, Scientific and Cultural Organization (UNESCO) no tama ona iha Lista Patrimóniu Kulturál Immateriál iha mundu, mak tina-tinan Timor-Leste kontinua promove, prezerva no proteze tais nu'udar identidade kultura Timor ninian.
Espera iha futuru Fundasaun Alola sei haforsa liután grupu soru tais ninian hodi kontinua produz tais ho kuantidade ne'ebé boot tuir nessesidade Timor ninian.
Tuir planu Governu sei halo fardamentu ba funsionáriu públiku no estudante sira, tanba ne'e, impotante tebes ba grupu soru tais sira atu produz tais ho kuantidade ne'ebé boot.
Fundasaun Alola hetan apoiu fundu husi USAID (United States Agency for International Developmen), turizmu ba ema hotu ho montante 30 mil ital dollar amerika atu hala'o eventu ‘FESTIVAL TAIS’ atu selebra tais nu'udar Patrimóniu Kulturál Immateriál ne'ebé rejista ona iha lista UNESCO.
Ba atividade ne'ebé sei hala'o iha festival refere mak hanesan demostrasaun soru tais, kór naturál, dansa kultura no muzika tradisionál inklui feira tais.
Reprezentante husi Membru Soru Tais, Rosaduli Mauki hatete, hanesan joven sente kontete no orgullu ba Governu no Fundasaun Alola bele kria ona festival ne'e hanesan dalan ida atu promove no dezenvolve di’ak liután Tais Timor inklui dezenvolve mós talentu soru tais nian.
“Durasaun ba ha’u aprende soru tais mak iha tinan 6 nia laran hahú husi idade 12 to’o idade 18. Esperansa ba oin hanesan joven ita tenke esforsu-an hodi promove no dezenvolve ita-nia kultura rasik liuhusi soru tais tanba tais ne'e hanesan identidade ida mai ita hanesan Timoroan”, dehan nia.
Rekomendasaun ba joven sira hotu labele moe atu aprende soru tais no ba joven presiza aprende barak liliu atu dezenvolve Timor-Leste nia kultura rasik. (*)
