Diretór Servisu Edukasaun Munisípiu Baukau, Augusto Ornai Ximenes, hatete, PKRIE iha Munisípiu Baukau dadaun hahú uluk ona konstrusaun ba eskola hamutuk 23.
Enkuantu ensiñu báziku sentral Letemumo ne'ebé antes ne'e hetan impedementu husi komunidade, dadaun ne'e rejolve ona.
Nune'e, iha loron 14 fulan-marsu tinan 2022 servisu edukasaun Munísipal sei enkontru ho parte enjiñeru no badaen husi Letemumo foti osan pursentu 25 hodi implementa konstrusaun uma-2 kompostu sala-6 iha tempu badak.
Bainhira, EBC Letemumo implementa tán, projetu rehabilitasaun no konstrusaun ba eskola iha Baukau ne'ebé la'o hamutuk 24.
"Eskola-5 ne'ebé seidauk (implementa PKRIE), tanba kondisaun klima karreta seidauk tama," dehan Augusto iha kna'ar fatin, sesta (11/03).
PKRIE iha Postu Baguia, ne'ebé seidauk implementa mak, eskola ensiñu báziku sentral Ossohuna halo rehabilitasaun ba uma-2 kompostu sala-6, ensiñu báziku filial Ussufulari konstrusaun sala-3, no ensiñu báziku filial Gulari konstrui sala-3.
Enkuantu iha Postu Laga, ensiñu báziku filial Lalabu'u konstrusaun sala foun ba estudante no Postu Kelikai ensiñu báziku filial Aboliri halo konstrusaun sala-3 ba estudante.
"Estrada tama ba laran difisil, entaun sira hein to'o udan para oituan maran ona mak foin sira bele tula matérial ba,"nia hatete
Projetu ne'e, bele fasilita ona eskola balun ne'ebé menus sala aulas, tanba ne'e, husu komunidade ne'ebé jere projetu PKRIE nafatin la'o tuir mata dalan dezeñu PKRIE nian, nune'e tinan-oin bele aumenta tán projetu iha Baukau.
"Ita fiar katak, 29 ne'ebé Baukau simu susesu hotu, tinan oin ita hetan tán projetu hanesan ne'e, bele minimiza prekupasaun kona-ba sala da aula," nia hatete
Antes ne'e, PKRIE ba Munísipiu Baukau hamutuk 30, maibé hafoin dezastre naturál iha Suku Bukoli estragus mós eskola ensiñu báziku filial (EFB Bukoli), nune'e Minisitéiru Edukasaun Juventude no Desportu (MEJD) deside kansella halo konstrusaun foun iha tinan 2022, entaun iha implementa iha Baukau hamutuk 29.
Enkuantu orsamentu ba projetu PKRIE eskola 29 tinan 2022 iha Munísipiu Baukau hamutuk rihun US$ 302, 014-resin. (*)
