“Ami lahatene tanba saida mak Ministériu seidauk asina akordu ho Plan Internasional durante ne'e mós ita hatene katak Plan Internasional sempre iha Ministériu Edukasaun Juventude no Desportu (MEJD) nia sorin maibé atu asina akordu sempre tarde liu”, dehan Dillyana Ximenes iha Salaun Konférensia MEJD, Villaverde Dili, segunda (14/03).
Tamba ne'e, Plan Internasionál husu ba Ministeriu atubele aselera akordu hodi fasilita alokasaun fundu ba nesesidade no ezijenisa husi Minitériu nian.
“Ami rekomenda ba Ministériu Edukasaun Juventude no Desportu (MEJD) atu aselera prosesu asina akordu entre Plan Internasional ho Ministériu. Sé akordu formal ne'e fasil tebes ba Plan Internasional aloka Fundus tuir ezijénsia Ministériu nian”, hatete nia
Bainhira akordu laiha difísil tebes ba Plan Internasional atu aloka fundu presiza halo identifikasaun entaun sei liu prosesu barak. Tanba ne'e Plan Internasional rekomenta parte rua bele aselera lalais prosesu ne'e.
Dirétor Nasionál Asaun Sosiál Eskolar, Joaquim Martins, rekoñese ezijénsia husi Plan Internasional kona-ba asina Memorandum Of Understanding (MoU) ne'ebé sei iha hela prosesu nia laran. Maibé Plan Internasional ajuda ona Ministériu lubuk ona materiál fiziku no non fiziku.
Dadaun ne'e, Plan Internasional nafatin fó apoiu ba Ministériu no agora mós Plan Internasional apoiu tan materiál konstrusaun emerjénsia hanesan kalen, ai no pregu kalen nian ba Ministériu. (*)