“Foinsa'e lidera mudansa liuhusi envolvimentu iha prosesu foti desizaun ne'ebé responsável ba sira-nia isin-lolon no sira-nia moris. Workshop nasionál ida ne'e halibur partisipante ho totál 100 foka ba saúde seksuál no reprodutiva no partisipasaun”, dehan Menejer Programa Plan, Maria Juleta R. Mota, iha workshop salaun Delta Nova, tersa (29/03).
Workshop ne'e, atu promove partisipasaun feto liliu foinsa'e feto iha atividade komunidade atu influénsia sira-nia partisipasaun no direitu iha prosesu foti desizaun.
“Atividade ida ne'e halibur garantiadór prinsipál sira, parte interesada no adolesente no foinsa'e sira, hodi ko'alia kona-ba direitu ba partisipasaun feto no labarik feto nian ba direitu ba saúde seksuál reprodutiva”, esplika nia.
Ho workshop ida ne'e rasik mak atu hasa'e koñesimentu ba adolexente no jovens kona-ba kondisaun foinsa'e agora liga ho asuntu saúde no direitu sexuál reprodutiva.
“Envolve partisipasaun adolexente no joven sira atu influénsia institusaun relevente sura kona-ba sira-nia asesu ba saúde no direitu sexuál reprodutiva hasa'e envolvementu no partisipasaun husi institusaun Governu no sosiédade sivil iha asuntu saúde no direitu reprodutiva ba foinsa'e sira”, dehan nia.
Plan International iha komitmentu nafatin empodera foinsa'e feto no mane ho diversidade liliu foinsa'e feto hodi asegura sira-nia poder ba sira-nia isin lolon no asegura sira iha koñesimentu ne'ebé klean hodi bele foti desizaun ne'ebé mak matenek ba sira-nia moris.
Iha Timor-Leste, isin-rua sedu ka isin-rua ho idade jovem sai debate diskusaun públiku no númeru isin-rua sedu ida ne'ebé aas no sai hanesan obstakulu ida ne'ebé Ia fasíl atu minimiza.
“Labarik feto ho idade tinan 15-19 iha risku dobru atu hetan mortalidade kauza relasiona ho isin-rua kompara ho Inan feto ho idade ruanulu ba leten”, afirma nia.
Tanba ne’e, atu kontribui ba solusaun hodi rezolve problema ida ne'e, Plan International Timor-Leste projeitu saúde seksuál no reprodutiva no partisipasaun ne'ebé hetan suporta finanseiru husi Governu Suesia no implementa ho parseiru importante tolu hanesan Nafofila, Fada no Talata iha Munisípiu Aileu no Ainaro. (*)
