Ba Jornalista sira ne’e mai husi mídia online, Imprime no televizaun ne'ebé tuir formasaun no kapasitasaun hamutuk 30-resin, iha salaun Parokial Imaculado Coração de Maria iha Maubisse.

Jornalista husi mídia online Neon Metin, Silvino da Costa Freitas, sente kontente ho formasaun ne’e, tanba bele ajuda hodi halo kobertura no produsaun iha área paz.

“Bele ajuda bele hakerek notísia tuir jornalizmu ba paz nian, no espera bele ajuda ita iha área jornalizmu ba paz”, dehan Silvino ba www.tempotimor.com iha Maubisse, kuarta (30/03).

Nune'e Jornalista Rádiu Televizaun Timor-Leste (RTTL), Almeiro Afonso hatee, ho formasaun peace jounalism ne'e atu ajuda jornalista sira kona-ba kobertura ba paz nian.

“Ha'u hanoin garante no importante tebes tanba formasaun ne'e bele lori jornalista sira ba hatene métodu hakerek notísia ne'ebé kontrola ho mensajen paz nian”, afirma nia.

Tanba jornslizmu ba paz ne'e ajuda jornalista sira hodi muda situasaun iha tempu krusiál hodi hanorin paz ba ema hotu liuhusi notísia sira ne’ebé produz.

“Baibain peace jounalism ne'e ema uza barak liu ne'e iha situasaun sira konflitu, atu nune'e bele muda situasaun konflitu liuhusi obra jornalistiku e peace jounalism ne'e tenke servisu hamutuk jornalista no editór atu hakerek notísia ninia mensajen notísia ne'e nakonu ho liafuan netraliza situasaun krusiál”, akresenta nia.

Ba formasaun ne’e atu konsensializa, jornalista sira halo kobertura produsaun to'o publikasaun notísia mídia nian hodi ko'alia kona-ba paz no direitu umanu sira atu evita notísia sensasionál no provokativu ne'ebé la kontribui ba paz estabilidade iha rai laran.

Tanba formasaun no kapasitasaun ba jornalista sira mós nu'udár parte ida hodi materializa Nota Intendementu entre Centro Chega ho Konsellu Imprensa kona-ba promosaun no protesaun direitu umanu hodi kontribui ba moris dame no harmonia iha komunidade sira liuhusi atividade jornalizmu nian.

Nune'e, kapasitasaun iha área Jornalizmu Paz ba jornalista sira ne'e importante tebes hodi hasa'e koñesimentu no kapasidade iha kontestu kobertura, produsaun to'o publikasaun notísia mídia nian hodi kontribui ba promove Paz no valór umanu sira.

Diretór Ezekutivu Centru Nasional Chega (CNC), Hugo Maria Fernandes hatete, CNC ho KI iha kooperasaun ida baze fundamental ida oinsá implementa rekomendasaun husi Relatóriu Chega iha ne'ebá hatete momoos fó enfaze forte ba entidade públiku liliu entidade estadu nian sira atu valoriza kna’ar jornalista sira-nian iha Timor-Leste ne'ebé mak independente.

“Kna’ar ida ne'ebé Governu tenke valoriza mak partisipasaun jornalista, mundu jornalizmu ne'e rasik nomós meius komunikasaun sira seluk tanba tinan 24-resin ita ukun-an entidade ne'ebé mak fó nia konstribui siknifikante tebes mak ba Timor ne'e mak mundu jornalizmu liuhusi jornalista sira-nia kna’ar entaun ida ne'e sai tiha komponente ida iha Timor nia istória ne'e mak CNC no KI kontinua valorize”, dehan nia. (*)