“Ho situasaun ida ne'e ita hakarak husu liliu aktu mafiozu osan falsu ne'ebé mak espalla iha ita-nia rain, tanba ida ne'e mak husu atu autoridade kompetente liliu PSIK no PNTL atu buka tuir autór ne'ebé mak iha ho profesionalizmu ne’e mak iha ha'u hanoin sira bele hetan iha tempu besik tanba ami hatene katak iha área Fatuhada ne'e iha loja sira barak ne'ebé husu ba autoridade ba fatin sira ne'e hodi bele loke CCTV hodi buka tuir se mak halo asaun ida ne'e”, dehan Cesario da Silva ba jornalista iha salaun ADTL Mascarinhas, kuarta (04/05).

Bainhira PSIK no PNTL hetan mafiozu refere sei aplika pena ida forte ba nia hodi nune'e evita akontese tan iha futuru, tanba ema ho Difisiénsia ida sai ona vítima ba hahalok ne'e.

Alende ADTL ne'ebé mak proteje ema ho Difisiénsia nia direitu sente triste tanba sei iha ema ne'ebé kontinua akuza ema ho Difisiénsia sira

“Organizasaun ida ne'ebé mak serbisu ba proteje ema ho Difisiénsia ami sente triste no laran taridu tebes tanba ema ho Difisiénsia matan hanesan Leonito limitasaun boot maibé nia nunka tane liman ba ema”, deklara nia.

Leonito da Costa Carmone ema ho defisiensia matan ida ne'ebé durante tinan barak ona hala'o nia atividade negósiu (fa'an pulsa no sigaru) tuir dalan públiku sira iha kapitál Dili, kuaze ema barak haree no hatene Leonito nia atividade loroloron nian.

Triste boot iha loron 2 fulan-maiu tinan 2022 Leonito simu moruk ida husi pesoál mafiozu, ne'ebé bosok nia ho osan falsu hodi hola nia pulsa telefone no sigaru iha área Fatuhada.

Portavoz Asosasaun Difisiénsia Timor Leste (ADTL), Rosalia Teresa Perreira husu entidade hotu atu respeita no valoriza ema ho Difisiénsia iha Timor-Leste.

“Husu ba públiku (entidade hothotu) atu respeitu no valoriza direitu sidadaun ho defisiénsia iha paiz ida ne'e, no husu ba públiku atu la bele mai ho hanoin karidade no kuitadu de’it ba ema ho defisiensia maibé tenke hanoin fó oportunidade atu sidadaun ho defisiensia bele hola parte iha kualker atividade tuir kbi'it ne'e ema ida-idak iha”, hatete Rosalia Teresa.

Bazeia ba ema mafiozu ne'ebé uza osan falsu hodi habosok ema ho Difisiénsia matan, Leonito da Costa Carmone ne'ebé mak fa'an pulsa iha área Fatuhada nian, hanesan atetude la di’ak no la respeita ne’ebé ema normal hatudu.

“Ami konsiente katak asaun hanesan ne'e planeadu husi individu no grupu ruma ne'ebé lori osan falsu hodi ba habosok ema kbil'it la'ek ne'ebé buka sira-nia moris liuhusi hisik sira-nia kosar wen rasik tan ne’e tenke prevene liuhusi penaliza sansaun ida forte ba autór”, dehan nia.

Tanba ne’e, husu ba parte kompetente atu asegura dalan públiku sira bele asesu ho livre husi ema la'o ain, tanba dala barak trotoar sira okupa tiha husi negosiante sira nune'e difikulta ba ema ho defisiensia atu la'o mesak no livre iha dalan públiku.

“Alerta ba públiku katak hahalok ne'ebé mafiozu ne'e halo hasoru maluk defisiensia ne'e aktu inmoral no aktu na’ok ten nian tanba ne'e mai ita hakribik hahalok a'at ida ne'e. Hakarak sublina liután katak Leonito ema ne'ebé iha limitasaun boot iha nia matan (la bele haree baut ida) maibé nunka tane liman hodi sustenta nia moris tanba ne'e mai ita louva Leonito hanesan ema insipradór ida iha ita-nia sosiedade no merese atu ema hotu banati tuir nia nasaun ne'e”, deklara nia. (*)