Tanba rekezitu kona-bá idade esplika klaru, profesor ne'ebé atu liu selesaun minimu idade-50 ba kraik, signifika ema ne'ebé moris iha tinan 1972 bele liu iha selesaun, maibé rezultadu falla hatudu ba Munisípiu Baukau, akontese profesór ida ho idade-51 liu selesaun voluntáriu ba kontratadu iha nasionál.

Enkuantu Profesór Eduardo Ximenes, husi Eskola ESG-filial Dom Carlos Filipe Bele, Afaça, moris iha tinan 1972, no hahú hanorin iha eskola ESG-filial Afaça husi tinan 2014-2023 agora, ho diploma lisensiatura area Edukasaun, maibé labele liu selesaun, tanba rekezitu idade fó limitasaun.

Maibé rekezitu rekrutamentu profesór voluntáriu ba kontratadu husi MEJD esplika momós katak, tenke sidadaun Timoroan, aprezenta kurikulu vitae, idade 17-50, kadidatura tenke aprezenta foto kopia habitasaun literaria legalizadu mininu baxarelatu, karta deklarasaun husi eskola, profesór voluntáriu iha eskola privadu presiza husi tinan 2003-2013, eskola públiku husi tinan 2007-2017, inklui eskola públiku por nesesariu 2018-2021.

"Ha'u iha evedensia, tanba profesór Berta da Costa Jereño data moris 11 janeiru 1971, bele liu selesaun, ami konsidera falla boot ida ne'ebé Ministru Edukasaun halo," dehan nia iha vila nova Baukau, Kuarta (15/02).

Situasaun ne'e halo profesór Eduardo Ximenes sente lamentavel, tanba ekipa verifikadór iha nasionál la neutralidade ba prosesu verifikasaun.

Hatan ba kestaun ne'e, Diretór servisu edukasaun Munisípiu Baukau, Augusto Ornai Ximenes, esplika, profesór voluntáriu iha ESG-filial Dom Carlos Ximenes Filipe Belo Afaça hamutuk na'in-15 mak antes ne'e submete dokumentus, maibé na'in-12 priense de'it mak bele priense rekezitu husi MEJD, ne'ebé halo ona aprovasaun iha loron 05 fulan-augosto tinan 2022, maibé profesór voluntáriu na'in-2 ne'ebé labele liu selaun, tanba la priense rekezitu husi MEJD.

"Mestre ida Eduardo ne'e nia moris iha 1972, entaun nia tinan kotuk halo prosesu ne'e 50 anos ona, entaun nia naran labele sai, depois mestre ida naran Julio tuir duni prosesu, maibé nia diploma sekúndariu de'it labele hanorin," nia dehan

Maske nune'e, servisu edukasaun Munisípiu Baukau sei defende direitu profesór voluntáriu na'in-2 husi ESG-filial afaça ba MEJD, iha erru balun hatudu iha lista públikasaun, alende mós depende tanba profesór refere kontribui ona Edukasaun durante tinan 10-resin ho voluntáriu.

"Ha'u reforsa sira nia preukupasaun ne'e, ha'u proteme sei lori situasaun ne'e ba Ministéru para agradese lai ba saida mak ema halo tiha ona iha tinan-10 kotuk liu-bá, ida evidensia (profesór ida idade 51 liu selesaun) ne'e sai ona baze ba sira hakerek iha reklamasaun ha'u reforsa, tanba sá balun idade liu ona sei liu", nia afirma

Alende mós sei reforsa profesór voluntáriu reklamante hamutuk na'in-348 ba MEJD, tanba despasu husi Ministériu, fó oportunidade ba reklamante sira atu submete hikas karta reklamasaun direita, ne'ebé sei hetan vistu husi koordenadór eskola hafoin intrega ba servisu edukasaun munisípal submete ba MEJD hodi hetan justifikasaun.

Tanba rekrutamentu profesór voluntáriu ba kratadu tinan 2022, husi Munisípiu Baukau profesór voluntáriu aprezenta kandidatu hamutuk 625, kompostu husi pre-eskolar, to'o nivél sekúndaria públiku no privadu, maibé profesór na'in-277 mak liu selesaun kaulifikadu atu asina kontratu iha fulan ne'e.

Maibé profesór voluntáriu ba kontratadu ne'ebé husi Baukau na'in-277 liu ona selesaun, seidauk sufisiente atu atende eskola hotu, tanba númeru profesór dadaun na'in-600, balun kondisaun fiziku lapermite ona, atu atende eskola sira.

"Di'ak liu Estadu haree lei pensaun obrigatóriu para balun katuas ne'e para ona, jovem sira barak la liu ne'e bele avansa fali, la'e ita halo labarik sira la liu ne'e frustradu hanoin aat fali ami dirijente sira ne'e," nia argumenta

Entretantu rekezitus rekrutamentu profesór voluntáriu ba kontratadu hamutuk 10, mak hanesan, tenke sidadaun Timoroan, aprezenta kurikulu vitae, idade 17-50, kadidatura tenke aprezenta foto kopia habitasaun literaria legalizadu mininu baxarelatu, karta deklarasaun husi eskola, profesór voluntáriu iha eskola privadu hanesan katóliku presiza husi tinan 2003-2013, inklui mós profesór voluntáriu husi 2007-2014, profesór voluntáriu iha eskola públiku husi tinan 2007-2017, inklui eskola públiku por nesesariu 2018-2021.

Alende mós iha rekezitu balun ne'ebé presiza ekipa verifikadór haree, hanesan kór envolope (map), tuir katégoria eskola, pre-eskolar kór mean, ensiñu báziku kór matak, sekundáriu jerál kór kinur. (*)