"Prezensa média ita utiliza sala. La utiliza referénsia ne'ebé di'ak. Ita haree ba parte ne'ebé negativu," dehan Komandante Jerál PNTL, Komisáriu Faustino da Costa, iha Palásiu Prezidensiál, Bairru-Pité, Kinta (5/3).

Utilizasaun média sosiál hanesan Facebook, tuir nia, loloos informa buat di'ak maibé provoka situasaun hodi interpreta no la tau-aan, liuliu tanba demokrasia to'o inan-aman mós labele mete.

Komisáriu Polisia Faustino akresenta, provokasaun média sosiál relasiona ho publikasaun osan falsu ne'ebé temi envolve husi lider nasionál Xanana Gusmão no Maunana nia-naran.

"Provokasaun iha média sosiál ne'e mak sai situasaun ne'ebé ami hato'o ba Prezidente Repúblika,"  dehan Faustino.

Entertantu, PNTL rasik hato'o ona ba públiku liuhusi konferénsia imprensa, iha Kuarta (4/3) katak, kazu pesoál ne'ebé envolve produs osan falsu ne'e akontese iha fin-du-anu 2019 ne'ebé Polisia Indonézia kaptura no daudaun ne'e halo investigasaun, maibé laiha envolvimentu lider nasionál hanesan Xanana Gusmão no Maunana.(*)