Tempotimor (Dili)-Polísia Nasional Timor-Leste (PNTL), liu husi komandu munisípiu Dili liuliu polísia tránzitu sei halo cek point ka pasa revista makas ba dokumentu karreta no motorizada iha tempu natál atu evita asidente.
Tanba motorista sira kontra sinais tránzitu, balun viatura para iha estasionamentu i balun espellu la iha, nune’e mós assesores viatura sira ne’e laiha inklui dokumentus.
"Tanba ne’e iha fulan-dezembru ne’e ita hasa’e volume cek point nia, tanba atu tama ona ba Natal no tinan foun ne’ebé ita tenke hasa’e volume hodi evita asidentes durante loron boot", dehan (PNTL) munisípiu Dili, Superintendente Xefi Orlando Gomes, iha kaikoli, segunda (18/12).
Nune'e mós komandante operasaun ho nia ekipa prende fugetis lubuk ne'ebé sunu iha bairo-laran, tanba halo barrulu no halo komunidade deksansa la diak
"Ita nia ekipa taskforce sira kalan nafatin halo operasaun hodi prende fugetis ne’ebé halo barullu, tanba ne’e ita konsidera hanesan perturbasaun ordem públika no halo ema la hakmatek, entaun polísia tenke halo asaun no halo operasaun hodi foti sasan sira ne’e. Iha fugetis balun ne’ebé sira uza kalen hodi uza gazolina, tanba ne’e ita tenke asegura atu labele mosu insidenti ruma ba sira nia an rasik", nia dehan.
Nune'e husu ba joven no komunidade hotu iha Dili atu halo kolaborasaun di’ak ho komandu munisípiu Dili, liu husi OPS no eskuadra sira bele kria ambiente paz iha tinan foun no natál.
Antes ne’e, PNTL liu husi komandu munisípiu Dili liuliu polísia tránzitu konsege rekolla koimas rihun US$25.480 ba kofre estadu, durante fulan-outubru nia laran.
"Durante ne'e ita nia komandu munsípiu Dili fó ordem ba sira tránzitu rodoviáriu hodi halo cek point iha tempu loron no tempu kalan. Iha fulan outobru ita konsege prende infrasaun hamutuk 719 ho total koima ne’ebé ita hatama iha kofre estadu nia iha fulan outubru mak rihun US$ 25.480", nia afirma.
Aleinde ne'e, komandu munisípiu Dili prende mós infrasaun iha fulan-novembru nian hamutuk 242 ho koimas USD$985 ba iha kofre estadu. (*)
