Tempotimor (Díli)- Sekretaria Estadu Arte no Kultura (SEAK) sempre fó apoiu ba sidadaun sira ne'ebé, fó proposta ka husu apoiu kona-bá Uma-Lisan nian, maibé depende ba verifikasaun.
Tuir Sekretáriu Estadu Arte no Kultura (SEAK), Teófilo Caldas katak, Governu prontu apoiu ba komunidade sira ne'ebé halo Uma-Lisan, maibé apoiu ne'e, atu hakmaan de'it servisu, la'os governu mak apoiu tomak ba konstrusaun Uma-Lisan.
"Iha orsamentu tinan 2019, ami konsege apoiu proposta Uma-Lisan hamutuk 40 resin, iha tinan 2020, ita la'o ho orsamentu rejime duadésimu, ami simu proposta barak hosi komunidade, maibé la konsege fó apoiu", dehan SEAK Teófilo Caldas, hafoin hasoru-malu ho Primeiru-Ministru, Taur Matan Ruak, iha Palásiu Governu, kinta (22/10).
Enkuantu iha Orsamentu Jerál Estadu (OJE) tinan 2020 ne'e, Sekretaria Estadu Arte no Kultura (SEAK) prevé ona, rihun 200, bainhira aprova ona hosi Parlamentu Nasionál no Prezidente Repúblika promulga ona, mak sei fó apoiu ba komunidade sira ne'ebé, hodi halo reabilitasaun, preparasaun no inagurasaun ba uma lulik.
"Agora apoiu ne'e, ninia kriteirus iha, rekezitus atu asesu ba orsamentu ne'ebé Sekretaria Estadu Arte no Kultura prevé, primeiru konstrusaun Uma-Lulik, tenke ho materiál tradisionál, segundu progresu uma lulik atinji ona pursentu hira", tenik Nia
Nia esplika, kontribuisaun ba Uma-Lisan ne'ebé mak komunidade sira halo no tuir sira-nia hakarak, Mais ou menus konstrusaun ne'e, atinji ona pursentu 20 ou 50, mak Governu foin bele apoiu tan, hodi halo kmaan de'it servisu, la'ós Governu mak halo fali Uma ba komunidade.
"Uma-Lulik ne'e, Governu iha dever morál tenke apoia, tanbá Uma-Lulik mos primeiru sentru kulturál, hodi halibur jerasaun ba jerasaun, segundu hanesan muzeu tradisionál, hodi konserva eransa kulturál ne'ebé Bei-ala sira husik hela mai ita, terseiru Uma-Lulik mos hanesan fatin turizmu kulturál ne'ebé, bele atrai turista sira, atu bá vizita", Nia dehan
Tuir Nia, bainhira turista sira bá vizita Uma-Lisan, sei hasa'e rendimentu, tanbá sira bele sosa produtu lokatl ne'ebé família sira prepara hela.
Entretantu, molok Governu atu fó apoiu ba komunidade sira ne'ebé hato'o ona proposta, kona-bá konstrusaun Uma-Lisan ne'e, iha ekipa ida hosi Sekretaria Estadu Arte no Kultura (SEAK) nian, sei tun ba halo verifikasaun, molok atu aprova ou fó apoiu ba konstrusaun refere.(*)