"Joven sira agora uza facebook maiória konsumu informasaun falsu iha online, tanba ne'e konsellu imprensa halo programa atu ajuda joven no estudante sira apoiu kampaña kombate Hoax timor", dehan Diretór Exekutivu KI, Rigoberto Monteiro ba media sira iha uatulete, segunda (08/11)

Nune’e, liu husi formasaun bele fó kuiñesementu ba hotu-hotu oinsa atu ulitiliza telefone android halo Fact-Checking haree notisia sira ne'ebé espalla iha facebook, antes fahe tutan iha média sosiál tenke hatene lolós notisia ne'e lós ou sala atu komunidade bele konsumu notisia ne'ebé mak lós.

Nia esklarese, kombate fake news, la'os kna'ar jornalista de'it, maibé presiza komunidade tomak nia kontribuisau, liu-liu estudante sira.

"Ami sei kontinua ba universidade sira iha dili, ami halo ona ba universidade UNTL departementu komunikasaun sosiál no UNITAL, ami sei kontinua ba universidade sira iha dili, liu-liu ba estudante sira", nia afirma

Formasaun durante loron rua ne'e, konsellu imprensa fó mata dalan ba partisipante sira, oinsa uza facebook rasik atu fahe notisia, tanba komunidade barak mak hela iha foho dala barak rona tutan informasaun falsu husi facebook halo disturbu informasaun iha komunidade nia leet.

Iha fatin hanesan, Vise Diretóra ICFP, Margic Beck hatete, formasaun formasaun ne’e fó oportunidade di'ak ba estudante sira, tanba bele hatene oinsa atu hapara notisia falsu ne'ebé espalla iha komunidade nia leet.

"Tuir ha'u nia hanoin presiza atu estuda hanoin identifika buat ne'ebé sala no buat ne'ebé lós", nia dehan

Estudante husi ICFP, Efemia Martins Belo hatete, liu husi formasaun ne’ebé durante loron rua nia laran konsege aprende ona materia balun no sei fahe tutan ba maluk sira seluk, oinsa atu kontra notisia Hoax.

Formasaun ne'e realiza, tanba hetan kooperasaun entre Konsellu Imprensa no embaixada Amerika iha Timor-Leste. (*)