Tanba, iha tinan 2019 udan no anin boot estraga hotu uma ba Eskola EBF Katólika Darenafa no dadaun laiha sala ne’ebé permanente ba estudante sira.
Vise-Koordenadór Eskola EBF Katólika Darenafa, José Manúel da Costa Filipe informa, parte eskola halo ona aprosimasaun ho diresaun Edukasaun Munisípiu Baukau, no Konektil Dioseze Baukau hanesan na'in ba eskola, maibé to’o agora sidauk iha resposta ruma.
"Tuir lolós tempu udan hanesan ne'e, ami labele fó ezame ba estudante sira, tanba edifísiu laiha, edifísiu ne'ebé mak ami uza provizoriu ne'e iha sala haat hamutuk ho postu klinika siska nian ami realiza ezame ne'e", dehan José ba www.tempotimor.com, sesta (19/11).
Sente triste ho kondisoins eskola ne'ebé anin sobu, maibé foti alternativu seluk tenke uza mós sala postu saúde siska nian hodi realiza ezame.
"Anin sobu sala provizoriu haat, permanente sala tolu, ida permanente ne'e hela de'it mak parede ou tembok, ida provizoriu ne'e rata, nein airin ida mós hela", nia afirma
Kestaun ne'e, eskola rasik halo ona proposta ba fundasaun konektil Dioseze Baukau no mós Ministéiru Edukasaun Juventude no Desportu, maibé sidauk hetan rezultadu pozitivu husi parte-2 ne'e.
Tanba ne'e, husu ba parte Konektil no Ministéiru Edukasaun Juventude no Desportu atu toma atensaun ba kondisoins eskola refere, tanba sala ba estudante kontinua sai preukupasaun.
Eskola EBF Katólika Darenafa iha númeru estudante hamutuk ema na’in-246 ne’ebé kompostu husi primeiru siklu to'o triseiru siklu. (*)