Iha ámbitu selebrasaun ne'e Vise Ministru Edukasaun Juventude no Desportu, António Guterres husu ba estudante EBC 30 ne'ebé preparadu atu tuir kompetisaun.
"Nune'e ha'u enkoraza nafatin alin estudante sira tuir atividade ida ne'e, tenke hatudu imi-nia matenek, hatudu imi-nia kapasidade, no hatudu katak imi bele, lakon ka manán ne'e buat seluk ida”, enkoraza Vise Ministru iha Salaun TVE, Komoro, kinta (16/12).
Nune'e Prezidente CNC, Hugo Fernandes hatete, eskola EBC sira ne'ebé mak atu tuir sertame matéria hirak ne'e sira simu ona iha sira-nia eskola.
"Eskola sira ne'ebé ita konvida, sira simu tiha ona, livru husi Centru Nasionál Chega, iha tiha ona sira-nia biblioteka ne'ebé mak orsida sai mós referensia ba sertame ba tinan ida ne'e nian”, dehan Hugo.
Matéria sira ne'ebé mak CNC prepara ba estudante sira mak hanesan Istória Nasionál, Edukasaun Sidadania, Direitu Umanu ba estudante sira.
Estudante sira ne'e mai husi EBC 3 sikulu sira ne'ebé partisipa iha sertame nasionál ne'e mak hanesan, EBC Raifú Maliana, EBC Ainaru, EBC Santa Ursula Baukau, no EBC sira iha Munisípiu Dili nian. (*)