Diretór Servisu Edukasaun Munisípal Baukau, Augusto Ornai Ximenes hatete, iha tinan 2021 Munisípiu Baukau hetan PKRIE hamutuk projeitu 30 no prosesu dadaun forma grupu komunitáriu sira asina ona kontratu MEJD hein atu implementa.
"Konta bankaria mós grupu komunitáriu sira loke hotu ona no Ministéiru fahe ona mai, mais servisu Munisípal hamutuk ho grupu komunitáriu sira ne'e hein hela osan, osan husi Ministéiru da Edukasaun bainhira mak transafere mai konta ne'ebé ami loke ona, hein orientasaun mai prontu ita hala'o", dehan Augusto kinta (16/12).
Totál orsamentu kategoria tranferensia públiku husi Orsamentu Jerál Estadu tinan 2021 ne'ebé MEJD aloka ba projetu 30 iha Munisípiu Baukau hamutuk rihun US$3-resin.
Projetu PKRIE atu halo konstrusaun edifisiu foun no rehabilitasaun ba edifisiu sira tuir kondisaun hodi responde ba kondisaun infrastrutura edukativa iha Munisípiu Baukau.
"Rehabilitasaun iha eskola ida mak Bukoli tanba anin sobu, unidade rua iha Osso-huna anin sobu sala rua kakuluk lori sai hotu, ida iha eskola katólika Darenafa ne'ebé anin sobu, tolu ne'e mak rehabilitasaun no 27 kuaze konstrusaun foun", Augusto hatete
Antes iha loron 09 Fulan-Dezembru tinan 2021, Koordenadór eskola Ensiñu Baziku Filiál (EBF) Kaibada Makasa'e, Domingos Freitas hatete, orsamentu ne'ebé Governu liuhusi MEJD aloka mai eskola EBF Kaibada Makasa'e pur-volta rihun US$1,017, tuir planu sei konstrui edifisiu foun ba estudante no profesores hamutuk sala-6 iha tinan-2022.
"Ami konta banaria loke hotu ona númeru rekening iha hotu ami nia liman, hein osan tama ne'e hahú ona", nia haktuir
Enkuantu projetu 30 ne'ebé mak MEJD lansa iha Munisípiu Baukau ba Pre-eskolar 3, Sekundária Jerál, Tekníku vokasionál ida no restu ba eskola ensiñu báziku. (*)
