Ministru Prezidensia Konsellu Ministru, Fidelis Leite Magalhães esplika, Konsellu Ministrus asiste aprezentasaun husi Ministru Finansas, Rui Augusto Gomes kona-ba kalendáriu preparasaun Orsamentu Jerál Estadu nian (OJE) ba tinan finanseiru 2023 nian.
“Tuir kalendáriu ne’ebé aprezenta ona, faze planeamentu nian sei hala’o iha fulan-marsu to’o loron 10 fulan-maiu tinan 2022, bainhira hahú faze preparasaun nian”, dehan nia iha Palásiu Governu, kuarta (23/02).
Semináriu “Jornada Orsamentál sira” tenke hala’o to’o loron 30 fulan-juñu no Konsellu Ministrus tenke halo apresiasaun ba projetu proposta Lei OJE tinan 2023 nian to’o loron 15 fulan-setembru tinan 2022.
Iha aprezensaun ne’e mós prevee katak OJE 2023 sei aprezenta ba Parlamentu Nasionál (PN) iha loron 1 fulan-outubru 2022, hodi halo preparasaun ba audénsia no debate iha plenária PN. (*)
