Sekrétariu jerál konsellu veteranu Munisípiu Baukau, Manuel da Costa Soares, haktuir, iha loron 16 fulan-fevereiru tinan-2022 simu orientasaun husi nasionál atu komemora loron 03 fulan-marsu loron veteran kada Munisípiu, maibé iha loron 24 fulan-fevereiru tinan 2022 orsamentu laiha, nune'e iha loron 25-26 fulan-fevereiru tinan 2022 halo konferensia impresa kansella serimonia selebrasaun loron veteranu.
"Ba ami sente triste, tanba loron importante loron mudansa estratejia funu ikus mai liberta rai ida ne'e, maibé ita nia estadu Governu la propoin orsamentu to'o kansella tiha de'it," dehan Manuel iha kna'ar fatin vila antiga, kuarta (02/03).
Aktividade ne'ebé konsellu veteranu nasionál propoin ba konsellu veteranu Baukau, atu husu misa ba eroi no martire sira no halo semináriu loron veteranu nian inklui isar bandeira, maibé orsamentu laiha tenke kansella.
"Planu ne'e, husi Munisípiu mak ba, orsamentu ne'e ita husu 15 mil, bele karik ita komemora loron entaun sira koloka orsamentu ba Baukau 15 mil, hein to'o ikus Sekretáriu Estadu ami konfirma Ministéiru Finansan mós dehan osan ne'e, sistema seidauk loke, tanba ne'e ami sente triste, dala ruma ba buat seluk sistema loke, ba loron importante sistema taka, la'os dehan duvida, maibé buat ruma lalos," nia hatete
Lolos ema hotu tenke respeita martire no eroi sira nia mate, tanba sira nia mate mak ohin loron Timor-Leste goza iha liberdade, nune'e tenke tau osan ba loron importante sira hodi festeza.
Laiha orsamentu ba selebrasaun loron veteranu nian iha Baukau, fó hanoin ba komunidade sira atu, hahú aban (loron 03 fulan-marsu tinan-2022) dada bandeira nasionál iha ida-ida nia uma oin, durante loron 7.
"Bandeira sa'e iha aban ne'e labele hatun, husik hanesan ne'e, ida ne'e hanesan fó penhormatan valorizasaun konsiderasaun ba ema sira ne'ebé mate, lakon ita nia Aswa'in barak oras ne'e ita nia inan feto barak mak faluk," nia argumenta
Sentidu importante husi loron 03 fulan marsu, tanba iha loron 03 fulan-marsu tinan 1981 konferensia iha Maubai forsas armadas Timor nian unidu tebes iha orientasaun ida no komandu ida hodi lidera funu.
"Konferensi iha Maubai forsa hotu unidus, tanba ne'e banati tuir sentidu unidade ne'ebé kria iha Maubai ne'ebé sira konsege hasoru obstaklu ne'ebé luar biasa, maibé sira nunka fahe malu, sira hamutuk lori povu nasaun to'o rohan, agora mós sentidu ne'e, ita kuda liu liu joven sira," nia argumenta
Tanba ne'e, foinsa'e tenke banati tuir sentidu unidade nasionál atu labele fahe malu iha interese nasionál, maibé banati tuir unidade nasionál ne'ebé kria iha Maubai. (*)
