“Ita presiza dezenvolve ita-nia kapasidade tomak iha rai laran atu produz saida mak ita presiza ba ita na'in rasik”, dehan nia hafoin hala'o kampaña eleitorál iha Bairopite, kuarta (16/03).

Tanba rekomendasaun sira husi povu bainhira eleitu sai Prezidente Repúblika sei esforsu ho hanoin ida ne’e atubele hamenus taxa ho preokupasaun ida kona-ba impaktu ba povu nia moris, liliu taxa importasaun sira.

Maibé nu’udar kandidatura PR, hakarak fó hanoin ba públiku katak, ko'alia kona-ba subsídiu públiku liliu ba parte importasaun fós, ida ne'e dalan primeiru mak presiza halakon subsídiu sira ne'e, segundu mak presiza dezenvolve kapasidade tomak iha rai laran atu produz saida mak povu presiza.

Tanba probelma ne'ebé afeta povu nia moris la'ós taxa aas, maibé problema loloos mak Governu la dezenvolve kapasidade agrikultór atu produz hahán sira ne'e.

“Ne'e mak ha’u hanoin ita presiza insetiva filafali ita-nia povu atu filafali ba natar filafali ba toos, atu pelu menus produz aihán bázika ne'ebe ita presiza, ne'e mak hau hanoin sei redus mos ita nia dependensia ba hahán ne'ebé presiza importa”, dehan nia.

Kandidatura Milena Pires mós konkorda kona-ba taxa ba alkol ba sigaru, taxa ba produtu sira ne'e aas atu nune'e Governu mós bele kontrola populasaun labele hetan moras husi fuma sigaru.

Kandidata ne'e fó ezemplu iha rai balun, hanesam iha Austrália, sigaru ohin loron karun tebtebes, tanba iha kompriensaun husi sira-nia ukun na'in sira, katak impaktu ba saúde husi fuma ne'e as tebtebes.

Tanba ne'e, maneira ida hapara ema atu fuma, hasa'e folin no hasa'e mós taxa maka’as ba produtu sira ne'e.

“Ba ha’u se ita ko’alia kona-ba produtu importadu hanesan sigaru ho alkol, ha’u konkorda katak taxa tenke as”, dehan nia. (*)