“Ohin loron ita bele asina ona kontratu ho kompaña sira ba reabilitasaun estrada rurál pakote hamutuk 39 ba munisípiu 5, restante sei iha prosesu aprovizionamentu tanba kompaña balun hatama nia dokumentu la priense kritéria tanba ne’e presiza retender fali no dadaun nee prosesu lao hela”, dehan Salvador Pires ba jornalista sira iha iha salaun City 8, Haslaran, Manleuana, Dili, kinta, (17/03).

Ho populasaun sira iha área rurál seidauk asesu ba estrda tanba ne’e liu husi implementasaun projetu iha estrada rurál ne’e hafoin remata bele fasilita komunidade sira.

“Ita-boot sira hatene katak pursentu hitunolu (70%) husi populasaun Timor-Leste hela iha área rurál, tanba ne’e ho projetu reabilitasaun estrada rurál ne’e importante para bele fasilita sira-nian nesesidade”, dehan nia.

Tanba ne’e, Ministru Obras Públika agradese ba Governu Austrália ne’ebé husi tinan 2012 to’o 2022 bele apoiu ona orsamentu mai Timor-Leste hodi fó asisténsia téknika, apoiu halo planeamentu, treinamentu nomós planeamentu ba estrada rurál.

Embaixadór Austrália iha Timor-Leste, William Terrence Costello hatete, Governu Austrália apoiu tékniku ba Timor-Leste desde tinan 2012 fornese asisténsia téknika iha área planeamentu, aprovizionamentu ba projetu estrada rurál sira ne’e.

“Finansiamentu ba projetu estrada rurál sira ne’e mai husi Governu Timor-Leste, no Governu Austrália fó de’it asisténsia tékniku para oinsá bele suporta Governu implementa programa estrada rurál”, dehan   Embaixadór William Terrence Costello.

Aliende ne’e projetu ba Estrada rurál iha munisípiu 5 hanesan Baukau, Likisá, Covalima, Vikeké nomós Bobonaru ho distánsia 132 kilometru (km) sei gasta orsamentu hamutuk tokon $15 husi fundu infraestrutura.

Tuir obervasun www.tempotimor.com iha asina kontratu ne’e partisipa husi Ministru Obras Públika (MOP), Prezidente Bee Timor Leste Empreza Públika (BTL.E.P), Prezidente EDTL, Prezidente Konselu Administrasaun Institutu Jestaun Ekipamentu (IJE) no Embaxaidór Austrália ba Timor-Leste. (*)