“Ita hatene katak iha dia 4 Abril tinan kotuk ita-nia instalasaun bee-moos barak mak hetan sobu, maibé dentru de fulan rua BTL konsege rekoperadu, ida-ne’e merese hetan apresiasaun e ha’u ko’alia ona ho sira (BTL.EP) para oinsá ministériu sei atribui sertifikadu ba kada pesoál ne’ebé envolve iha esforsu naruk”, hatete Ministru Obras Públikas, Abel Pires, ba jornalista sira iha edifísiu Diresaun Nasionál Estrada Ponte no Kontrolu no Seias tutela ba Diresaun Jerál Obras Públikas (DNEPCC-DJOP), Rai-Kotu, Dili.

Tanba ne’e, Ministru Abel kontente teb-tebes iha biban ko’alia ho jestór sira, tanba antes hamutuk ho sira mós iha dader ha enkontru importante ida ho reprezentante husi Banku Dezenvolvimentu Aziátiku (ADB) sira fó apresiasaun di’ak teb-tebes ba servisu husi BTL nian.

“Ha’u ba ho objetivu rua, ida mak atu fó koñese-an, segundu mak atu kongratula sira, la’ós de’it ba sira-nia servisu di’ak agora ne’ebé husi banku ADB hatete maibé liuliu ba intervensaun sira ne’ebé sira halo ba rekoperasaun impaktu husi kalamidade”, dehan nia.

Hoida ne’e, enkoraja atu Diresaun Jerál Obras Públikas (DJOP) mós bele servisu maka’as liután hodi hetan apresiasaun husi ministériu iha tinan 2023 tanba konsege halo intervensaun ba rekoperasaun kalamidade 4 Abril 2022.

Antes vizita ba DNEPCC-DJOP Rai-Kotu, Ministru hala’o vizita uluk ba edifísiu BTL.EP, Kaikoli, Dili ne’ebé simu direita husi Prezidente BTL.EP, Carlos Peloi dos Reis, ho nia estrutura no kontinua kedas hala’o enkontru ho jestór sira hodi hato’o direita apresiasaun ba tékniku no funsionáriu tomak BTL.EP nian.

Iha intervensaun Ministru Abel hatete, hanesan eis Prezidente komisaun E iha Parlamentu Nasionál ne’ebé trata asuntu infraestrutura nian fó biban hodi aprende iha área infraestrutura nian inklui bee-moos rasik dezde 2017, no rekoñese katak bee-moos ne’e imporante ba komunidade, tanba ne’e, esforsu ne’ebé BTL.EP halo ho emidiata konsege rekopera distribuisaun bee-moos ba komunidade. (*)