Tempotimor (Dili)-Xéfe Suku Manumera, Postu Turiskai, Munisípiu Manufahi, Isabel de Jesus, preokupa ho ema Kbi'it La'ek no Oan Ki'ak ne'ebe laaAsesu ba Uma Kbi'it La'ek (UKL), ne’ebé oferese husi Governu.
“Agradese tebes ba VIII Governu ne'ebe kria Programa Implementasaun Uma Kbi'it La'ek (UKL) ba Komunidade Kbi'it La'ek sira maibé prekupasaun mak oinsá ho oanki'ak sira ne'ebé inan aman laiha ona no Komunidade Kbi'it La'ek ne'ebé nia uma at ona sira iha direitu ka la’e ba UKL”, hatete Isabel de Jesus hafoin Partisipa iha diálogu Komunitáriu ho MAPkoms iha Postu Administrativu Turiskai, sesta (25/03).
Tanba iha suku laran komunidade balun konsidera hanesan kbi’it la’ek no oanki’ak seidauk bele sai benefisiáiu ba Programa ULN, ne’ebé implementa husi Programa Nasionál Dezenvolvimentu Suku (PNDS).
Ba kestaun ne'e, Diretora Programa Nasionál Dezenvolvimentu Suku (PNDS), Claudinha Soares Pinto hatete, Komunidade Kbi'it La'ek iha territótiu Timor laran ho númeru ne'ebé as tebes, foin hahú prepara uma ne'ebé dignu no seguru ba komunidade sira.
“Ita iha rekezitu ne'ebé hatur ona iha manual ko’alia kona-ba sustentabilldade ba programa no sustentabilidade ba atividade ne'e rasik katak ema ne'ebé merese duni mak bele hetan uma husi programa UKL”, dehan Claudinha Soares Pinto iha kna'ar fatin, Kolmera-Dili, tersa (29/03).
Tanba ne'e, Suku sira la'o tuir matadalan ne'ebé iha ona enkuantu Sekretariadu Tékniku Programa Nasional Dezenvolvimentu Suku (PNDS) fasilita prosesu sira no entrega hotu ba suku no komunidade sira mak implementa.
“Rekezitu husi manuál ne'e mak primeiru sosializasaun nível Munisípiu atu fahe informasaun ba suku kona-ba kuantidade UKL sei hetan husi kada suku no aldeia ida mak autoridade lokál sira aprezenta lista benefisiáriu sira”, esplika nia.
Iha feze daruak nian, komunidade kbi'it la'ek sira tenke iha oan mínimu na'in-ida ka beioan ne'ebé hela ho sira se laiha entaun sira labele hetan sustentabilidade uma ne'e sei laiha tanba se sira rua laiha ona.
Ba faze datolu nia mak oan ki'ik tenke ho idade sanulu-resin-hitu ba leten tanba iha responsabilidade no sai xefe família, maibé oan ki’ak sira ho idade 16 mai kraik mak sei la hetan no hein oportunidade tuir mai.
Lista benefisiáriu ne'ebé hetan Uma Kbi'it La'ek (UKL) nian prepara husi suku no komunidade rasik enkuantu ekipa tékniku husi PNDS fasilita de'it prosesu sira ne'e, atu garante ba sustentabilidade programa no sustentabilidade husi atividadare refere.
Enkuantu tinan 2021 implementasaun programa UKL hamutuk uma 1.254 la responde hotu, no tinan 2022 ne'e, mai ho kuantidade uma 4.000, no ninia implementasaun ba Timor laran tomak. (*)
