Diretóra PNDS Baukau, Amelia Maria Viegas, hatete, UKL faze daruak tinan-2022 nian iha Munísipiu Baukau kompostu 59, suku 56 konklui ona verifikasaun no suku 3 hanesan, Alaua-kraik, Samalari no Lavateri, ne’ebé pertense ba postu Adminisitrativu Baguia mak sidauk, maibé garante semana oin sei konklui.
"Ami tenta nafatin para semana oin konklui ona prosesu, tanba time line Abril agora komesa konstrusaun ona, maibé depende mós ba tranferensia osan ne'e mai, tanba ita lansamentu tenke iha osan infraestrutura," dehan Amelia iha kna'ar fatin vila nova, sesta (01/04).
Orsamentu ba UKL tinan-2022, dadaun Minisitéiru Finansas (MF) seidauk transfere ba konta bankaria suku 59 iha Baukau, tanba verifikasaun seidauk konklui, maibé remata ona verifikasaun, tempu badak sei transfer.
Tuir planu konstrusaun UKL hahú iha fulan-abril no finaliza iha fulan-dezembru tinan-2022, maibé depende ba kondisaun estrada iha tereñu no iklima.
"Fatin ne'ebé sai preukupasaun nafatin baguia, kelikai, tanba iha ne'eba suku balun nia área dook dala ruma asesu dalan susar, kuandu udan difikulta tebes," nia argumenta
Entertantu, medida UKL ba tinan-2022 nafatin hanesan uluk, enkuantu UKL ba 59 iha Baukau hamutuk 553 ho Orsamentu tokon US$9.779.520 no osan ba operasional hamutuk US$ 359.718,00.
Alende mós, progresu UKL faze dahuluk tinan-2021 suku barak mak remata ona, ba Postu Adminisitrativu 5 hanesan Baukau vila, Laka, Kelikai, Venilale no Vemase nia pursentu atinji ona 80 ba leten, maibé iha Postu Baguia kontinua tarde, tanba udan estrada aat difikulta tranporte tula matérial ba fatin destinadu, nune'e fizikamente foin atinji pursentu 40.
"Nia iha ona pursentu 62 ba Munísipiu Baukau tomak, tanba iha postu seluk kuaze uma prontu hotu ona hein halo nia relatóriu depois entrega," nia hakotu (*)