Tuir informasaun ne’ebé www.tempotimor.com asesu husi Gabinete Ministru Finansas, domingu (03/04) katak, kapasidade organizasaun Forsas Armadas F-FDTL, estabelese baseline ida ba progresu dezenvolvimentu nomós identifika dezafiu sira ne’ebé mak durante ne’e enfrenta liliu iha área Finansas Públika.
Enkontru ne’ebé hala’o iha loron 01 abril, Ministru Rui Gomes fahe informasaun kona-ba Lei Foun Enkuadramentu Orsamentál liga ho Grandes Opções do Plano ne’ebé daudaun ne’e Ministériu Finansas prepara hela bazeia ba input husi Liña Ministériu no Instituisaun Estadu sira inklui Ministériu Defeza no Forsas Armadas F-FDTL.
Nune’e mós fó hanoin ba Ekipa Traballu atu konsidera hodi aliña Grandes Opções do Plano ho Lei Programasaun Militár ne’ebé Ministériu Defeza sei aprezenta ba Parlamentu Nasionál iha tinan 2022 nia laran.
Daudaun ne’e, Ekipa Traballu halo ona entrevista ho entidade no Instituisaun Estadu relevante sira ne’ebé iha relasaun servisu iha área Defeza no Seguransa Nasionál.
Tuir planu, ekipa traballu sei aprezenta relatóriu preliminár ba Xefe Estadu-Maiór-Jenerál Forsas Armadas atu hetan komentáriu molok aprezenta iha Konferénsia Internasionál kona-ba Dezenvolvimentu Forsa Defeza iha fulan-agostu 2022.
Ekipa Traballu ba Avaliasaun kona-ba Kapasidade Forsas Armadas F-FDTL lidera husi Komodoro Pedro Klamar Fuik, Xefe Estadu-Maiór Forsas Armadas, Kapitaun José Pinto, Tenente Julia, Alferis Bukar no membru sira seluk. (*)
